स्याङ्जाको वालिङमा झण्डै २६ वर्षपछि श्याम स्मृति फुटबल प्रतियोगिता पुनः सञ्चालन हुने भएको छ । वालिङ युवा क्लबको आयोजनामा जेठ २८ गतेदेखि असार १ गतेसम्म वालिङ खेलमैदानमा प्रतियोगिता सञ्चालन गरिने भएको हो ।
जिल्लाकै पुरानो फुटबल प्रतियोगितामध्ये एक मानिने श्याम स्मृति फुटबल प्रतियोगितालाई पुनः निरन्तरता दिन लागिएको वालिङ युवा क्लबका अध्यक्ष केशरबहादुर थापा (राजन) ले जानकारी दिए । उनका अनुसार स्वर्गीय श्याम थापाको स्मृतिमा सञ्चालन हुँदै आएको प्रतियोगिताले विगतमा वालिङ तथा आसपासका क्षेत्रका खेलाडी उत्पादनमा महत्वपूर्ण योगदान पुर्याएको थियो ।
नयाँ खेलाडीलाई अवसर प्रदान गर्नुका साथै स्थानीय स्तरमा फुटबल गतिविधिलाई थप सक्रिय बनाउने उद्देश्यले प्रतियोगितालाई पुनः सञ्चालन गरिएको अध्यक्ष थापाले बताए । आगामी दिनमा पनि प्रतिभावान खेलाडी उत्पादनमा प्रतियोगिताले सहयोग पुग्ने विश्वास आयोजकको छ ।
प्रतियोगितामा स्याङ्जा, पाल्पा र पर्वतका गरी १० टोलीको सहभागिता रहने जनाइएको छ । संस्थापक समिति संयोजक एलबी ज्वारचनले खेलकुदमार्फत वालिङको पहिचानलाई राष्ट्रिय तथा अन्तर्राष्ट्रिय स्तरसम्म पुर्याउन र नयाँ प्रतिभालाई प्रोत्साहन गर्न प्रतियोगिताले भूमिका खेल्ने बताए ।
नेपाल पत्रकार महासंघ स्याङ्जाका अध्यक्ष प्रदीप कोइरालाले वालिङका पुरुष तथा महिला खेलाडीले राष्ट्रिय टोली तथा विभिन्न क्लबबाट उत्कृष्ट प्रदर्शन गर्दै आएको उल्लेख गर्दै यसले वालिङको खेलकुद पहिचानलाई थप उचाइमा पुर्याएको बताए ।
आयोजकका अनुसार प्रतियोगिता सञ्चालनका लागि करिब ५ लाख ४८ हजार रुपैयाँ आम्दानी हुने र ५ लाख ३० हजार रुपैयाँ खर्च हुने अनुमान गरिएको छ । प्रतियोगिताको विजेताले एक लाख रुपैयाँ नगदसहित शिल्ड, मेडल र प्रमाणपत्र प्राप्त गर्नेछ भने उपविजेताले ५० हजार रुपैयाँ नगदसहित शिल्ड, मेडल र प्रमाणपत्र पाउनेछ ।
प्रतियोगिताबाट बचत हुने रकम ज्येष्ठ नागरिकलाई लक्षित खुला व्यायामशाला निर्माणमा खर्च गर्ने योजना रहेको आर्थिक व्यवस्थापन उपसमिति संयोजक सुरेश श्रेष्ठले जानकारी दिए ।
फुटबल खेलाडी श्याम थापाको वि.सं. २०५१ असार २३ गते वालिङ खेलमैदानमै फुटबल खेलिरहेका बेला चट्याङ लागेर निधन भएको थियो । त्यसपछि उनको स्मृतिमा परिवार र सहयोगीहरूको पहलमा केही वर्ष प्रतियोगिता सञ्चालन भए पनि विभिन्न कारणले निरन्तरता पाउन सकेको थिएन । अहिले २६ वर्षपछि पुनः उनको स्मृतिलाई जीवित राख्ने उद्देश्यसहित प्रतियोगिता सञ्चालन गर्न लागिएको आयोजकले जनाएको छ ।
