नेपाल कम्युनिष्ट पार्टी (एमाले)का तर्फबाट स्याङ्जा निर्वाचन क्षेत्र नम्बर–१ मा प्रतिनिधिसभा सदस्यका उम्मेदवार मिनप्रसाद गुरुङले आगामी पाँच वर्षका लागि ३३ बुँदे प्रतिबद्धता सार्वजनिक गरेका छन् । ‘समृद्ध स्याङ्जा, जनताको हित’ भन्ने मूल नारासहित सार्वजनिक गरिएको सङ्कल्प पत्रमा पूर्वाधार, सामाजिक विकास, उद्यमशीलता तथा स्थानीय अर्थतन्त्र, कृषि तथा पशुपन्छी विकासलाई मुख्य आधार बनाइएको छ ।
गुरुङले पाँच वर्षभित्र निर्वाचन क्षेत्रका सबै स्थानीय तहका केन्द्रलाई कालोपत्रे सडक सञ्जालले जोड्ने लक्ष्य अघि सारेका छन् । वडा केन्द्रसम्म सडक विस्तार गर्ने र सिद्धार्थ राजमार्गलाई स्तरोन्नति गरी स्याङ्जा–पाल्पा–रुपन्देहीलाई जोड्ने आर्थिक करिडोरका रूपमा विकास गर्ने योजना पनि उनको प्राथमिकतामा परेको छ ।
यसैगरी, ज्याग्दी र आँधीखोला करिडोर सुधार, वैकल्पिक लोकमार्ग निर्माण, ‘एक घर–एक धारा’ अभियानमार्फत खानेपानी विस्तार, आवश्यक स्थानमा पक्की तथा झोलुङ्गे पुल निर्माण गर्ने प्रतिबद्धता गरिएको छ । सदरमुकाम स्थित मालेबगर खेलमैदानलाई सुविधासम्पन्न बनाउने र प्रत्येक पालिकामा कम्तीमा एक खेलमैदान निर्माण गर्ने योजना पनि समेटिएको छ ।
सामाजिक क्षेत्रमा गुरुङले निरपेक्ष गरिबी आधाले घटाउने, अति विपन्न परिवारलाई उद्यमशील कार्यक्रममा आबद्ध गर्ने र बेरोजगारी दर घटाउने लक्ष्य राखेका छन् । स्वास्थ्य बिमामा शतप्रतिशत सहभागिता सुनिश्चित गर्ने उनको अर्को प्रतिबद्धता छ ।
स्वास्थ्य र शिक्षातर्फ स्याङ्जा सदरमुकामस्थित प्रदेश अस्पताललाई ५० शय्यामा पूर्ण क्षमतासहित सञ्चालन गर्ने, स्थानीय तहका अस्पतालको पूर्वाधार पूरा गर्ने तथा सामुदायिक विद्यालय सुधारका लागि सङ्घीय शिक्षा ऐन संशोधन पहल गर्ने योजना अघि सारिएको छ । विद्यालय तहदेखि नै उद्यमशीलता शिक्षा लागू गर्ने, दलित समुदायका परम्परागत सिप संरक्षण गर्दै आयआर्जनमा जोड्ने तथा विधवा र एकल महिलालाई लक्षित कार्यक्रम सञ्चालन गर्ने उल्लेख छ ।
युवालाई सीपमूलक तालिममार्फत स्वदेशमै रोजगारी सिर्जना गर्ने, होमस्टे स्तरोन्नति गरी अन्तर्राष्ट्रिय सिकाइ केन्द्रका रूपमा विकास गर्ने तथा साहसिक पर्यटनका सम्भावना उजागर गर्दै पूर्वाधार विस्तार गर्ने लक्ष्य पनि राखिएको छ । निजी क्षेत्रसँग सहकार्य गरी सुन्तला प्रशोधन र जडीबुटीजन्य उद्योग स्थापना गर्ने प्रतिबद्धता पनि गरिएको छ ।
कृषितर्फ सुन्तला, कफी र मसलाबालीको क्षेत्र विस्तार, गाईभैंसी जोन विकास, सहकारीमार्फत जग्गा चक्लाबन्दी र दुई सय आधुनिक कृषि तथा पशुपन्छी फर्म स्थापना गर्ने योजना समेटिएको छ ।
गण्डकी प्रदेश सभाका पूर्व सदस्य गुरुङले यो सङ्कल्प पत्र पार्टीको घोषणापत्र नभई आफ्नो व्यक्तिगत कार्यदिशा भएको स्पष्ट पार्दै कार्यान्वयनका लागि मतदातासँग साथ र समर्थनको आग्रह गरेका छन् ।
