स्याङ्जाको अर्जुनचौपारी गाउँपालिकामा अवस्थित धार्मिक तथा पर्यटकीय सम्भावना बोकेको नेपालकै पहिलो नवग्रह मन्दिर आसपासको क्षेत्रलाई धार्मिक पर्यटनको आकर्षक गन्तव्य बनाउने लक्ष्यसहित गाउँपालिकाले होमस्टे (घरबास) कार्यक्रम अघि बढाएको छ ।
गाउँपालिकाले सार्वजनिक सूचना जारी गर्दै स्थानीय बासिन्दा तथा टोल समूहलाई होमस्टे सञ्चालनका लागि आवेदन दिन आह्वान गरेको हो ।
नवग्रह मन्दिर दर्शन गर्न आउने भक्तजन तथा पर्यटकलाई स्थानीय कला, संस्कृति, परम्परा र अर्गानिक खानपानसहितको आतिथ्यता प्रदान गर्ने उद्देश्यले कार्यक्रम ल्याइएको प्रमुख प्रशासकीय अधिकृत युवराज अर्यालले जानकारी दिए । यसबाट एकातर्फ धार्मिक पर्यटन प्रवर्द्धन हुने र अर्कोतर्फ स्थानीयस्तरमा आम्दानीका नयाँ अवसर सिर्जना हुने अपेक्षा गरिएको अर्यालले बताए ।
स्थानीय सहभागितामै आधारित भएर नवग्रह क्षेत्रको विकास गर्न खोजिएको प्रमुख प्रशासकीय अधिकृत अर्यालले बताए । “धार्मिक पर्यटनलाई दीगो र व्यवस्थित बनाउँदै स्थानीयलाई प्रत्यक्ष लाभ दिने उद्देश्यले यो कार्यक्रम ल्याइएको हो,” उनले भने, “यसले गाउँको पहिचानसँगै आर्थिक गतिविधि पनि विस्तार गर्छ ।”
होमस्टे सञ्चालनका लागि निश्चित मापदण्डसमेत तोकिएका छन् । कम्तीमा दुईवटा सफा पाहुना कोठा, व्यवस्थित शौचालय, स्थानीय उत्पादनमा आधारित अर्गानिक खाना, सात्विक भोजन र अनुशासित वातावरण अनिवार्य गरिएको छ । साथै, बेलुकीको समयमा भजन–कीर्तनमार्फत आध्यात्मिक वातावरण निर्माण गर्नुपर्ने व्यवस्था पनि राखिएको छ ।
दर्ता प्रक्रियाका लागि आमा समूह शाखाबाट तोकिएको फारम भर्नुपर्नेछ भने इच्छुकहरूले सूचना प्रकाशित भएको मितिले १५ दिनभित्र गाउँपालिका वा सम्बन्धित वडा कार्यालयमा निवेदन दिनुपर्नेछ । छनोटमा परेका घर वा समूहलाई गाउँपालिकाले तालिम र प्राविधिक सहयोग उपलब्ध गराउने जनाएको छ ।
