विश्व औलो दिवस २०२६ को अवसरमा स्याङ्जामा आयोजित सचेतनामूलक अन्तरक्रिया कार्यक्रममा जिल्लामा औलो रोगको जोखिम निकै न्यून रहेको जानकारी दिइएको छ ।
“औलो अन्त्य हाम्रो संकल्प : सक्षम छौं, छैन अब विकल्प” भन्ने नारासहित प्रदेश जनस्वास्थ्य कार्यालय स्याङ्जाले सरोकारवालासँग अन्तरक्रिया कार्यक्रम आयोजना गरेको हो । कार्यक्रममा कार्यालयका निमित्त प्रमुख उमेश कुमार तामाङले पछिल्ला चार वर्षमा जिल्लाभर जम्मा पाँच जना औलो संक्रमित भेटिएको बताए ।
उनका अनुसार आर्थिक वर्ष २०७९/८० देखि चालू आर्थिक वर्ष २०८२/८३ सम्म पाँच जना बिरामी फेला परेका हुन् । जिल्लामा ‘भाइभेक्स’ र ‘फाल्सिफारम’ प्रकारका औंलो संक्रमण देखिएको उनले जानकारी दिए ।
उक्त अवधिमा पुतलीबजार नगरपालिकामा दुई जना, वालिङ नगरपालिका, अर्जुनचौपारी गाउँपालिका र गल्याङ नगरपालिकामा एक/एक जना संक्रमित भेटिएको मलेरिया फोकल पर्सन पृथ्वी लामिछानेले जानकारी दिए । उनका अनुसार संक्रमित सबै बिरामी उपचारपछि निको भइसकेका छन् ।
उनले जिल्लामा स्थानीय स्तरमा औलो सर्ने अवस्था नरहेको भन्दै विशेषगरी भारतलगायत उच्च जोखिम क्षेत्रबाट फर्किने व्यक्तिमा संक्रमण देखिएको बताए ।
प्रदेश जनस्वास्थ्य कार्यालयले औलो नियन्त्रणका लागि जनचेतना कार्यक्रम, समयमै परीक्षण, उपचार तथा कन्ट्याक्ट ट्रेसिङजस्ता काम नियमित रूपमा गरिरहेको जनाएको छ ।
कार्यक्रममा जिल्ला समन्वय समिति प्रमुख श्रीप्रसाद जीटीले सरकार र सरोकारवालाको संयुक्त प्रयासबाट औलो नियन्त्रण सम्भव भएको बताए ।
