स्याङ्जाको भीरकोट नगरपालिका–९ मा निर्माण भएको चराङ–धोवादीखोला साउन्दी झोलुङ्गे पुलमा पहिरो खसेपछि पूर्वाधार विकास कार्यालय स्याङ्जाले निर्माण कम्पनीलाई पहिरो हटाएर तत्काल आवतजावत सहज बनाउन निर्देशन दिएको छ ।

साउन मसान्ततिर पुलको छेउमा पहिरो खसेपछि स्थानीयको आवतजावत प्रभावित भएको हो । पहिरोका कारण पुलसमेत कोल्टिएको र स्थानीयलाई आउजाउमा समस्या भएको थियो ।

सामाजिक सञ्जालमार्फत भदौ ३ गते समस्याबारे जानकारी पाएपछि पूर्वाधार विकास कार्यालय स्याङ्जाले निर्माण कम्पनी कर्णाली कन्स्ट्रक्सन एण्ड सप्लायर्स, काठमाडौंलाई पहिरो हटाउन निर्देशन दिएको जनाएको छ ।

कार्यालयका प्रमुख सिडिई गुरुदत्त अधिकारीका अनुसार भदौ ४ गते नै निर्माण कम्पनीलाई पत्राचार गर्नुका साथै फोनमार्फत पनि पहिरो हटाएर आवागमन सहज बनाउन निर्देशन दिइएको थियो ।

कार्यालयका इन्जिनियर पोषराज पौडेलका अनुसार पुलमा खसेको पहिरो सामान्य प्रकृतिको भएकाले करिब १० देखि १२ हजार रुपैयाँ खर्चमै हटाउन सकिने अवस्था छ । निर्माण कम्पनीले कार्यालयको निर्देशन पालना नगरे कार्यालयले कम्पनीको धरौटी रकम जफत गरेर आफैं पहिरो हटाउने उनले बताए ।

उनका अनुसार निर्माण कम्पनीको एक लाख ८० हजार रुपैयाँ धरौटी कार्यालयमा रहेको छ ।

पौडेलले पुलको निर्माण गुणस्तर र डिजाइनमा कुनै समस्या नरहेको दाबी गरेका छन् । उनका अनुसार भित्ताको ढिस्को खसेर पुलमा आवतजावतमा अवरोध पुगेको हो ।

चराङदेखि धोवादीखोला साउन्दीसम्म जोड्ने उक्त झोलुङ्गे पुल निर्माणका लागि ५६ लाख ६१ हजार चार सय ४२ रुपैयाँ लागत अनुमान गरिएको थियो । पुल भने ४० लाख ४२ हजार पाँच सय ७० रुपैयाँमा निर्माण सम्पन्न भएको हो ।

पूर्वाधार विकास कार्यालय र निर्माण कम्पनीबीच २०८२ जेठ २५ गते निर्माण सम्झौता भएको थियो । कार्यालयका अनुसार पुल निर्माणको काम २०८३ जेठ १० गते सम्पन्न भएको हो ।

निर्माण सम्पन्न भएको केही समयमै पुल आसपास पहिरो खसेपछि स्थानीयको आवतजावत प्रभावित बनेको छ । कार्यालयले निर्माण कम्पनीलाई पहिरो हटाउन निर्देशन दिइसकेको जनाएको छ ।