२९ वर्षको उमेरमै अनिल ढकाल नेपाली कांग्रेसको पालिका सभापति बनेका छन् ।
नेपाली कांग्रेसको १५औँ महाधिवेशनअन्तर्गत स्याङ्जाको आँधीखोला गाउँपालिका सभापतिमा सर्वसम्मत चयन भएसँगै उनी उमेरका हिसाबले गण्डकी प्रदेशकै कान्छो पालिका सभापति बनेका हुन् ।
गत बुधबार सम्पन्न गाउँपालिका अधिवेशनबाट ढकाल सर्वसम्मत सभापतिमा निर्वाचित भएका हुन् । विद्यार्थी जीवनबाटै राजनीतिमा सक्रिय ढकालले कक्षा ९ मा अध्ययन गर्दादेखि नेपाल विद्यार्थी संघ (नेविसंघ) मार्फत राजनीतिक यात्रा थालेका थिए ।
उनले विसं.२०६७ कात्तिक २६ गते तत्कालीन नेपाली कांग्रेसका सभापति एवं पूर्वप्रधानमन्त्री स्वर्गीय सुशील कोइरालाबाट पार्टी सदस्यता लिएका थिए ।
सभापतिमा चयन भएपछि ढकालले पुरानो पुस्ताको अनुभव र नयाँ पुस्ताको ऊर्जालाई जोडेर पार्टी संगठनलाई अघि बढाउने बताएका छन् । आँधीखोलामा कांग्रेस संगठनलाई थप सुदृढ र प्रविधिमैत्री बनाउँदै जनताको भरोसा जित्ने गरी काम गर्ने उनको भनाइ छ ।
