अर्जुनचौपारी गाउँपालिका स्थानीय तह संस्थागत क्षमता स्वमूल्याङ्कन (लिसा) मा उत्कृष्ट बनेपछि जिल्ला समन्वय समिति स्याङ्जाबाट सम्मानित भएको छ ।
आर्थिक वर्ष २०८०/८१ का लागि गरिएको स्वमूल्याङ्कनमा पालिकाले ८८.७५ अंक र वित्तीय सुशासन जोखिम मूल्याङ्कनमा ९४ अंक प्राप्त गर्दै जिल्लाभरि पहिलो स्थान हासिल गरेको जिल्ला समन्वय अधिकारी नवराज बरालले जानकारी दिए ।
गत सोमबार समितिको कार्यालय स्याङ्जामा आयोजित २०८१/८२ को वार्षिक समीक्षा कार्यक्रममा प्रदेश सभा सदस्य सुधिर कुमार पौडेलले गाउँपालिका उपप्रमुख सपना गुरुङ र प्रमुख प्रशासकीय अधिकृत युवराज अर्याललाई प्रमाणपत्र प्रदान गरेका थिए ।
पहिलेदेखि नै विभिन्न राष्ट्रिय मूल्याङ्कनमा उत्कृष्ट बन्दै आएको अर्जुनचौपारीले सेवा प्रवाहदेखि योजना कार्यान्वयन, बजेट व्यवस्थापन, पारदर्शिता र जवाफदेहितामा निरन्तर राम्रो प्रदर्शन गर्दै आएको छ । पालिका अध्यक्ष प्रकाश तिवारीको नेतृत्वमा पालिकाले पटक–पटक उच्च अंक ल्याउन सफल भएको बताइन्छ ।
अध्यक्ष तिवारी यसअघि ४० वर्षमुनिका प्रभावशाली ४० युवाको सूचीमा समेत परेका थिए ।
