स्याङ्जाको अर्जुनचौपारी गाउँपालिका स्थित स्थानीय विद्यालयमा गठन भएका चेन्ज मेकर क्लबहरूले शुक्रबार गाउँपालिकाभर एकसाथ सरसफाइ र व्यवहारिक सिकाइ गतिविधि गरेर उदाहरण प्रस्तुत गरेका छन् ।
गाउँपालिकाका ६ वटै वडाका विद्यालयहरूमा सक्रिय क्लबहरूले विद्यालय र नजिकका सामुदायिक क्षेत्र सफाइ गर्दै बालबालिकाको व्यवहारिक सीप विकासमा जोड दिएका थिए । गाउँपालिकामा रहेका २ आधारभूत, ६ सामुदायिक माध्यमिक र १ संस्थागत माध्यमिक विद्यालयका क्लबहरूले एकैदिन कार्यक्रम सञ्चालन गरेका हुन् ।
यहाँको वडा नं. १ का पञ्चकन्या माध्यमिक विद्यालयका विद्यार्थीहरूले विद्यालय परिसर, स्थानीय खेलमैदान र स्वास्थ्यचौकी क्षेत्रमा सफाइ साथै विज्ञान विषयसँग सम्बन्धित वल्र्ड ग्रुप परीक्षणको ज्ञान लिएका छन् । सोही वडाको अर्जुनचौपारी चिल्ड्रेन एकेडेमीले विद्यालय परिसर सफा पारेको छ ।
यसैगरी, वडा नं. २ को अमर ज्योति माध्यमिक विद्यालयले बालबालिकाको व्यवहारकुशलता र व्यक्तिगत सफाइसम्बन्धी गतिविधि सञ्चालन गर्यो । वडा नं. ३ को सरस्वती आधारभूत विद्यालयले विद्यालय, खानेपानी ट्यांकी र नजिकैको मन्दिर क्षेत्र सफा गर्यो भने वडा नं. ४ स्थित जन माध्यमिक विद्यालयले एकानन्द गुफा जाने बाटो र गुफा परिसरमा सरसफाइ गरेको छ ।
त्यस्तै, वडा नं. ५ मा सर्वोदय मावि, घण्टे मावि र बुद्ध आधारभूत विद्यालयका क्लबहरूले डहरे देउराली मन्दिर क्षेत्र, विद्यालय परिसर, बजार क्षेत्र र खानेपानी मुहान सरसफाइ गरेका छन् । वडा नं. ६ को दरौं माध्यमिक विद्यालयले पालिकामा अवस्थित नेपालकै पहिलो नवग्रह मन्दिर परिसरमा सफा गर्दै मन्दिरभित्रका पिपलका बिरुवामा गोडमेल गरेको छ ।
यी गतिविधिले विद्यार्थीमा सामाजिक उत्तरदायित्व र सामुदायिक सहभागिता बढेको बताउँदै गाउँपालिका अध्यक्ष प्रकाश तिवारीले भने, “विद्यार्थीहरूको सक्रियता देखेर गर्व लागेको छ । यसले समुदायमा सकारात्मक सोच र जिम्मेवारीको भावना थपिएको छ ।”
स्थानीयले विद्यार्थीको पहललाई स्वागत गर्दै यस्ता कार्यक्रम निरन्तर हुनु पर्नेमा जोड दिएका छन् ।
