स्याङ्जाको अर्जुनचौपारी गाउँपालिका ३ नं. वडा कार्यालयले टोल–टोलमै पुगेर स्थानीयलाई सेवा प्रवाह गरेको छ । वडाले ‘घुम्ती सेवा शिविर’ सञ्चालन गरी सेवाग्राहीको घरदैलोमै सरकारी सेवा उपलब्ध गराएको हो ।
वडा कार्यालयबाट दुर्गममा रहेको आग्रीखर्क टोलमा पुगेर सञ्चालन गरिएको शिविरमार्फत तीन जनाको जन्मदर्ता, एक जनाको विवाह दर्ता, एक नयाँ नागरिकता र एक नागरिकता प्रतिलिपि सिफारिस गरिएको वडा अध्यक्ष सोभाकान्त काफ्लेले जानकारी दिए ।
साथै, तीन वटा तिरो तिरेको र दुईवटा अन्य सिफारिस सेवा पनि प्रदान गरिएको वडा कार्यालयले जनाएको छ । शिविरकै अवसरमा वडामा चलिरहेका तीनवटा विकास योजनाको अनुगमन समेत गरिएको थियो ।
वडा अध्यक्ष काफ्लेले घुम्ती शिविरको माध्यमबाट दुर्गम बस्तीमा बस्ने नागरिकलाई कार्यालय धाउन नपर्ने व्यवस्था गरेको बताउँदै सबै टोलमा पुगेर सेवा दिने बताए । ‘सेवा वडाबाट होइन, वडाले गाउँगाउँमा’ भन्ने अभियानमार्फत स्थानीयले संघीयताको अनुभूति समेत पाएको वडा कार्यालयले जनाएको छ ।
साविकको रापाकोटका पाँच वडाबाट बनेको वडा नम्बर ३ पालिकाको लम्बाइको हिसाबले सबैभन्दा ठूलो वडा हो ।
