नेकपा एमालेका सचिव पद्मा अर्यालले जेनजिले अघि सारेका माग र एमालेका एजेन्डा एउटै दिशामा रहेको बताएकी छन् । उनका अनुसार देशलाई भ्रष्ट्राचारमुक्त बनाउँदै सुशासन कायम गर्ने लक्ष्य दुवै पक्षको समान उद्देश्य हो ।

शुक्रबार स्याङ्जामा जिल्ला कमिटीद्वारा आयोजित जनसभामा बोल्दै अर्यालले जेनजि आन्दोलनलाई बदनाम गर्ने प्रयास प्रतिगामी शक्तिहरूको षड्यन्त्र भएको आरोप लगाएकी थिइन् । “जेनजिले न देश जलाउने काम गरेको छ, न समाजमा त्रास सिर्जना गरेको छ,” अर्यालले भनिन्, “प्रतिगामीलाई हटाएर मुलुकलाई लोकतन्त्र र गणतन्त्रको मार्गमा फर्काउन एमाले सडकमा आएको हो ।”

अर्यालले बंगलादेश र डेनमार्कको उदाहरण दिँदै जननिर्वाचित सरकार हटाएर असंवैधानिक सरकारले चुनाव गराउँछु भन्नु नै हास्यास्पद भएको बताइन् । संसद जीवित हुँदाहुँदै अहिलेको सरकारले देश असफल बनाउने उद्देश्यसहित गठन गरिएको उनको आरोप थियो ।

त्यसैगरी, एमाले पोलिटब्यूरो सदस्य महेश बस्नेतले वर्तमान सरकार संविधानको मर्मविपरीत बनेको दाबी गरे । उनले आगामी महाधिवेशनबाट केपी शर्मा ओलीलाई पुनः अध्यक्ष बनाउनु आवश्यक रहेको जिकिर गरे । “गुटरहित एमाले बनाउने हाम्रो लक्ष्य हो,” बस्नेतले भने, “मंसिर ५ गते एक सिटी बजाउनासाथ एक लाख युवा उतार्ने लक्ष्यसहित यूथ भोलिन्टियर फोर्स गठन हुँदैछ ।”

कार्यक्रममा एमाले केन्द्रिय सदस्य सीता सुन्दासले पार्टीका हालका गतिविधिबारे जानकारी दिइन् । जिल्ला अध्यक्ष सूर्यप्रसाद गैह्रे पारसको अध्यक्षतामा भएको कार्यक्रम उपाध्यक्ष महेश पुरीको स्वागत र सचिव रामचन्द्र भट्टराईको सञ्चालनमा सम्पन्न भएको हो । स्याङ्जाको पुतलीबजार नगरपालिका -१ स्थित सिटिहलमा जनसभा सुरु हुनुअघि सयौँ कार्यकर्ता पुतलीबजारमा नारा लगाउँदै नगरपरिक्रमा गरेका थिए ।