बालमैत्री भीरकोट नगरपालिका र स्मार्ट सिटीको रूपमा परिचित वालिङ नगरपालिकाको सिमानामा रहेको गडी भञ्जाङ आधारभूत विद्यालयमा बार्दलीमा विद्यार्थी पढाउनुपर्ने बाध्यता अन्त्य भएको छ । २ कोठे नयाँ भवन बनेपछि बार्दली र सिढीमा पढाउनुपर्ने बाध्यता अन्त्य भएको हो ।

२०७२ सालको भूकम्पमा परी विद्यालय भवनमा क्षती पुगेपछि केही समय त्यही पुरानो भवनमा टिनले बारेर भएपनि पठनपाठन गरिएको थियो तर बर्षाको समयमा त्यो पनि भत्केपछि सिढी र बार्दली नै कक्षाकोठाको रूपमा प्रयोग गरिएको थियो । स्याङ्जाको भीरकोट नगरपालिका वडा नं. ५ मा अवस्थित शिशुदेखी ३ कक्षासम्म पढाइ हुने गडी भञ्ज्याङ आधारभूत विद्यालयमा कक्षाकोठाको अभावमा सात वर्षसम्म सिढी र बार्दलीमा विद्यार्थी पढाउनुपर्ने बाध्यता थियो ।

नगरपालिकाका भित्ता र सार्वजनिक स्थान बाल अधिकारका सचेनामूलक सन्देशले भरिएपनि भाषण र प्रचारमा जस्तो गत असारसम्म यहाँका विद्यार्थीहरूले बालमैत्री विद्यालयको अनुभूति गर्न पाएका थिएनन् । कक्षाकोठाको अभावमा कक्षा २ र ३ ले बार्दली र सिढीमा पढ्दै आएका थिए । वर्षाको समयमा भने विद्यालयको कार्यालयमै राखेर पढाउनुपर्ने बाध्यता थियो ।

आर्थिक वर्ष २०८१/८२ को असारमा २ कोठे भवन निर्माण भएपछि बार्दली र सिढीमा पढाउनुपर्ने बाध्यता अन्त्य भएको विद्यालयका प्रधानाध्यापक सरला विकले जानकारी दिइन् । नगरपालिकाले कक्षाकोठा निर्माणका लागि पाँच लाख रकम विनियोजन गरेको थियो । पाँच लाख २० हजार लागतमा टिनले छाएको २ कोठे भवन निर्माण सम्पन्न भएपछि कक्षाकोठामा नै पठनपाठन भइरहेको प्रधानाध्यापक विकले बताइन् ।

जनजाति समुदायका विद्यार्थीको बाहुल्यता रहेको विद्यालयमा वालिङ र भीरकोट नगरपालिकाका ४६ जना विद्यार्थीहरु अध्ययनरत छन् ।  विद्यालयको नाममा ३ रोपनी जग्गा छ । तर बालमैत्री नगरपालिकाको विद्यालयमा प्रार्थना गर्न र खेल्नका लागि खेलमैदान समेत छैन । कारण विद्यालयको आँगनबाट नै सडक खनिएको छ । शौचालय जान समेत सडक पार गरेर जानुपर्ने बाध्यता छ ।