स्याङ्जाको गल्याङ नगरपालिकाले बजारभित्र वर्षौंदेखि झुण्डिइरहेका अव्यवस्थित तार हटाउन कडा कदम चाल्दै सम्बन्धित निकायलाई १५ दिनभित्र व्यवस्थापन गर्न निर्देशन दिएको छ ।

नगर क्षेत्रका मुख्य सडक र बजार लाइनमा विद्युत्, टेलिफोन, केबल तथा इन्टरनेटका तार लत्रिँदै झुण्डिएको अवस्थाले नगरको सौन्दर्य बिग्रिनुका साथै जोखिम बढिरहेको भन्दै पालिकाले तत्काल सुधारको पहल गरेको हो ।

अव्यवस्थित तारले दुर्घटना र आगलागी दुवै खतरा बढाएको गल्याङका नगरप्रमुख गुरुप्रसाद भट्टराईले बताए । “गाउँदेखि सहर सबै ठाउँमा तार झोल्मोल छन्, अब यसलाई व्यवस्थित बनाउनु हाम्रो पहिलो प्राथमिकता हो,” भट्टराईले बताए ।

तारको अस्तव्यस्तताले सडक छेउछाउ कुरुप देखिनुका साथै आगलागी हुनसक्ने सम्भावना रहेको स्थानीयले पनि गुनासो गरेका छन् । बजार व्यवस्थित गर्न ‘बसौं बसौं लाग्ने गाउँ र सहर : समुन्नत र समृद्ध गल्याङ’ अभियानसहित पालिकाले काम अघि बढाएको नगरपालिकाले जनाएको छ ।