आगामी फागुन २१ गते हुने प्रतिनिधिसभा निर्वाचनका लागि स्याङ्जा क्षेत्र नम्बर १ मा मंगलबार १३ जनाले उम्मेदवारी दर्ता गराएका छन् । मुख्य निर्वाचन अधिकृतको कार्यालयका अनुसार ११ जना राजनीतिक दलबाट र दुई जना स्वतन्त्र उम्मेदवार रहेका छन् ।
नेकपा (एमाले) बाट पुतलीबजार नगरपालिका–९ का मिनप्रसाद गुरुङ, नेपाली कांग्रेसबाट आँधीखोला गाउँपालिका–६ का भरतराज ढकाल, राष्ट्रिय स्वतन्त्र पार्टीबाट पुतलीबजार–५ का डा. धनञ्जय रेग्मी, नेपाली कम्युनिस्ट पार्टी (नेकपा) बाट अर्जुनचौपारी गाउँपालिका–५ का शैलेन्द्र घिमिरेले उम्मेदवारी दर्ता गराएका हुन् ।
यस्तै, राष्ट्रिय प्रजातन्त्र पार्टीबाट पुतलीबजार–८ का हुकुमबहादुर राना, मंगोल नेशनल अर्गनाइजेसनबाट बिरुवा–२ का यामबहादुर गुरुङ, नेशनल रिपब्लिक नेपालबाट फेदीखोला गाउँपालिका–२ का अर्जुनकुमार गुरुङ, उज्यालो नेपाल पार्टीबाट कास्की पोखरा महानगरपालिका–२५ का रविन्द्र मल्ल उम्मेदवार बनेका छन् । नेकपा (माओवादी केन्द्र) बाट पुतलीबजार–२ का सोमबहादुर परियार, प्रगतिशील लोकतान्त्रिक पार्टीबाट फेदीखोला–४ का रनबहादुर विश्वकर्मा र श्रम संस्कृति पार्टीबाट वालिङ नगरपालिका–४ का पिरन गुरुङले पनि उम्मेदवारी दर्ता गराएका छन् ।
स्वतन्त्रतर्फ आँधीखोला–२ का मनोज नेपाली दर्जी र अर्जुनचौपारी–१ का अशोक विष्ट उम्मेदवार रहेका छन् । मुख्य निर्वाचन अधिकृत उपेन्द्रप्रसाद गौतमका अनुसार सबै उम्मेदवारले कानुनी प्रक्रिया पूरा गरी दर्ता गराएका हुन् ।
उम्मेदवारी दर्तापछि अधिकांश उम्मेदवारले देश र जनताको हितका लागि चुनावी प्रतिस्पर्धामा उत्रिएको प्रतिक्रिया दिएका छन् । ठूला दलका उम्मेदवारले बाजागाजा र समर्थकसहित दर्ता गराउँदा साना दल र स्वतन्त्र उम्मेदवार भने प्रस्तावक–समर्थकका साथ शान्त रूपमा उपस्थित भएका थिए ।
