स्याङ्जाको अर्जुनचौपारी गाउँपालिका–१ स्थित नवग्रह मन्दिर परिसरमा महाशिवरात्रिको अवसर पारेर आयोजित प्रथम स्याङ्जा अन्तरविद्यालय भजन प्रतियोगितामा गल्याङ नगरपालिका–२ को रामनदीधाम संस्कृत गुरुकुलमले प्रथम स्थान हात पारेको छ ।

पालिकाको आयोजनामा सम्पन्न प्रतियोगितामा जिल्लाका १३ विद्यालयको सहभागिता रहेको थियो । प्रतिस्पर्धामा उत्कृष्ट प्रस्तुति दिँदै गुरुकुलमले १२ विद्यालयलाई पछि पार्दै नगद २५ हजार रुपैयाँसहित उपाधि जित्न सफल भयो ।

अर्जुनचौपारी–२ को अमरज्योति मावि, लामडाँडा द्वितीय बन्दै १६ हजार रुपैयाँ प्राप्त गर्‍यो भने अर्जुनचौपारी–१ को अर्जुनचौपारी चिल्ड्रेन एकेडेमी तृतीय स्थानमा रहँदै १० हजार रुपैयाँ हात पार्न सफल भयो ।

नगद पुरस्कारसहित प्रमाणपत्र वितरण गर्दै गाउँपालिकाका अध्यक्ष प्रकाश तिवारीले परम्परागत संस्कृति जगेर्ना र प्रवर्द्धन गर्ने उद्देश्यले भजनगीत प्रतियोगिता आयोजना गरिएको बताए ।

पुरस्कार वितरणमा बोल्दै उनले यस्ता कार्यक्रमले मौलिक संस्कृतिको संरक्षण मात्र नभई जिल्लाभरका विद्यालयका विद्यार्थीबीच चिनजान र अनुभव आदान–प्रदान गर्ने अवसर समेत सिर्जना गरेको उल्लेख गरेका छन् ।

प्रतियोगितामा गल्याङ, भीरकोट, वालिङ नगरपालिका र अर्जुनचौपारी गाउँपालिका क्षेत्रका विद्यालयले भजनमार्फत आ–आफ्नो सांगीतिक प्रतिभा प्रस्तुत गरेका थिए । धार्मिक वातावरणबीच विद्यार्थीहरूले प्रस्तुत गरेका भजनले दर्शकलाई आध्यात्मिक भावनामा डुबाएको थियो ।

कार्यक्रमलाई अझ आकर्षक बनाउन चर्चित लोक तथा भजन गायक पशुपति शर्माले विशेष प्रस्तुति दिएका थिए । उनले भगवानप्रति समर्पित भजनसँगै लोकप्रिय गीतहरू प्रस्तुत गर्दा मन्दिर परिसरमा उपस्थित भक्तजन झुम्मिएका थिए । राष्ट्रिय कलाकार घनश्याम रिजाल, अर्जुन गैह्रे र गोपाल जिटीले पनि सांगीतिक प्रस्तुति राख्दै माहोल तताएका थिए ।

भजन प्रतियोगितासँगै भजन कन्सर्ट, सांगीतिक प्रस्तुति तथा शिव ताण्डव डिजे साँझसमेत आयोजना गरिएको थियो । गाउँपालिकाका अनुसार कार्यक्रमले वृद्धवृद्धा मात्र नभई युवा र बालबालिकालाई पनि आध्यात्मिक तथा सांस्कृतिक गतिविधिमा आकर्षित गरेको छ ।

पञ्चकन्या तथा जलवराह धार्मिक वन, केटीचौर (सिमलचौर) मा अवस्थित नेपालकै पहिलो नवग्रह मन्दिरमा यस अवसरमा नौ लाख ९९ हजार ९ सय ९९ दिप प्रज्वलन गरिएको थियो ।

करिब आठ हेक्टर क्षेत्रफलमा फैलिएको धार्मिक वनभित्र नवभुज आकारको २७ फिट अग्लो नवग्रह मन्दिर निर्माण गरिएको छ । यहाँ रहेको सौर्यमण्डलीय ब्रह्माण्डको मूर्ति भने प्रत्येक वर्ष गणेश चतुर्थीका दिन मात्र सर्वसाधारणका लागि अवलोकन खुला गरिने र सो दिन पालिकास्तरमै सार्वजनिक बिदा दिइने जनाइएको छ ।

गत वर्ष फागुन ६ गतेदेखि १४ गतेसम्म महाशिवरात्रिकै अवसरमा प्राण प्रतिष्ठा तथा अनुष्ठान पश्चात् विधिवत् रूपमा मन्दिर स्थापना भएपछि यसले जिल्लाकै महत्वपूर्ण आध्यात्मिक केन्द्रका रूपमा पहिचान बनाउँदै गएको छ ।

विभिन्न ठाउँबाट भक्तजनको आगमन बढ्दो क्रममा रहेको मन्दिर व्यवस्थापन समितिका अध्यक्ष भरतराज पोखरेलले बताए । उनका अनुसार एक वर्षको अवधिमा पाँच लाखभन्दा बढी भक्तजनले मन्दिरको दर्शन गरिसकेका छन् ।

नवग्रह मन्दिर निर्माणसँगै अर्जुनचौपारी धार्मिक पर्यटनको नयाँ गन्तव्यका रूपमा चिनिन थालेको स्थानीयबासीको भनाइ छ ।