सिद्धार्थ राजमार्ग अन्तर्गत स्याङ्जाको भीरकोट नगरपालिका–४ छ्याङ्छाङ्दीमा प्रहरीले लागूऔषधसहित दुई जनालाई पक्राउ गरेको छ ।

विशेष सूचनाको आधारमा जिल्ला प्रहरी कार्यालय स्याङ्जा, वडा प्रहरी कार्यालय वालिङ र प्रहरी चौकी दहथुमबाट खटिएको विशेष अप्रेसन टोलीले बिहीबार राती चेकजाँचका क्रममा लागूऔषध बरामद गरेको जिल्ला प्रहरी कार्यालय स्याङ्जाले जनाएको छ ।

वालिङबाट भीरकोटतर्फ आउँदै गरेको ग २३ प ४०४२ नम्बरको स्कुटर रोकी जाँच गरिएको थियो । चेकजाँचका क्रममा स्कुटरमा सवार वालिङ नगरपालिका–८ बस्ने ३६ वर्षीय रोशन परियार र सोही स्थानका ३४ वर्षीय पुकार लोहनीको साथबाट ब्राउन सुगर जस्तो देखिने ३ ग्राम खैरो पदार्थ फेला परेको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक प्रसन्न राज चौधरीले जानकारी दिए ।

उक्त स्कुटरसहित दुवै जनालाई नियन्त्रणमा लिइएको छ । लागूऔषध सम्बन्धी कसूरमा उनीहरूविरुद्ध मुद्दा दर्ता गरी स्याङ्जा जिल्ला अदालतबाट सात दिनको म्याद थप अनुमति लिई आवश्यक अनुसन्धान प्रक्रिया अघि बढाइएको प्रहरीले जनाएको छ ।