सिद्धार्थ राजमार्गअन्तर्गत स्याङ्जाको वालिङ नगरपालिका–६ मिर्दीमा शंकास्पद अवस्थामा हिँडिरहेका एक युवकलाई प्रहरीले लागूऔषधसहित पक्राउ गरेको छ ।
शुक्रबार दिउँसो करिब वडा प्रहरी कार्यालय वालिङबाट खटिएको विशेष अप्रेसन टोलीले चेकजाँच गर्ने क्रममा उनको शरीरमा लुकाइछिपाइ राखिएको अवस्थामा विभिन्न लागूऔषध बरामद गरेको जिल्ला प्रहरी कार्यालय स्याङ्जाका सूचना अधिकारी प्रसन्न राज चौधरीले जानकारी दिए ।
पक्राउ पर्नेमा वालिङ नगरपालिका–८ बस्ने २३ वर्षीय नरेन्द्र रनपाल रहेका छन् । उनको साथबाट बुप्रेनोर्फिन इन्जेक्सन आईपी ११ एम्पुल, प्रोमेथोजाइन हाइड्रोक्लोराइड आईपी फेनेरगन ११ एम्पुल, डाइजेपाम इन्जेक्सन आईपी ११ एम्पुल, सिरिन्ज ३ थान र मोबाइल १ थान बरामद भएको प्रहरीले जनाएको छ ।
डिएसपी चौधरीका अनुसार पक्राउ परेका रनपालविरुद्ध लागूऔषध सम्बन्धी कसूरमा अनुसन्धान अगाडि बढाइएको छ । रनपाललाई आइतबार स्याङ्जा जिल्ला अदालतबाट ७ दिनको म्याद थप अनुमति लिई आवश्यक अनुसन्धान प्रक्रिया अघि बढाइएको प्रहरीले जनाएको छ ।
