फागुन २१ गते सम्पन्न प्रतिनिधिसभा सदस्य प्रत्यक्ष निर्वाचनमा स्याङ्जाका दुई निर्वाचन क्षेत्रमा प्रतिस्पर्धा गरेका १८ जना उम्मेदवारको जमानत जफत भएको छ । जिल्लामा रहेका क्षेत्र नम्बर १ र २ दुवैमा नौ/नौ जना उम्मेदवारले आवश्यक मत नपाउँदा जमानत जफत भएको हो ।
निर्वाचन कार्यालय स्याङ्जाका अनुसार क्षेत्र नम्बर १ मा कुल ७० हजार ९४४ मत खसेको थियो । त्यसमध्ये दुई हजार ९०८ मत बदर हुँदा ६८ हजार ३६ मत सदर भएको थियो । सदर मतको १० प्रतिशत मत प्राप्त गर्न नसक्ने नौ जना उम्मेदवारको जमानत जफत भएको क्षेत्र नम्बर १ का मुख्य निर्वाचन अधिकृत उपेन्द्रप्रसाद गौतमले जानकारी दिए ।
उक्त क्षेत्रमा राष्ट्रिय स्वतन्त्र पार्टीका डा. धनञ्जय रेग्मी २९ हजार ७१ मतसहित विजयी भए । नेपाली कांग्रेसका भरतराज ढकालले १८ हजार ८५७ तथा नेकपा एमालेका मीनप्रसाद गुरुङले १६ हजार ८०४ मत ल्याउँदै जमानत जोगाएका छन् ।
अन्य उम्मेदवारमध्ये नेकपा (कम्युनिस्ट) का शैलेन्द्र घिमिरेले एक हजार ५५२, राष्ट्रिय प्रजातन्त्र पार्टीका हुकुमबहादुर रानाले ६९८, श्रम संस्कृति पार्टीका पिरन गुरुङले ४८९, मङ्गोल नेशनल अर्गानाइजेसनका यामबहादुर गुरुङले २१६, उज्यालो नेपाल पार्टीका रविन्द्र मल्लले १७६, नेशनल रिपब्लिक नेपालका अर्जुनकुमार गुरुङले ६१, नेकपा माओवादीका सोमबहादुर परियारले ५७, प्रगतिशील लोकतान्त्रिक पार्टीका रनबहादुर विकले ३० र स्वतन्त्र उम्मेदवार अशोक बिष्टले २५ मत मात्र प्राप्त गर्दा जमानत जफत भएको हो ।
यस्तै, क्षेत्र नम्बर २ मा ६४ हजार ९२८ मत खसेको थियो । त्यसमध्ये दुई हजार ६६२ मत बदर भई ६२ हजार २६६ मत सदर भएकोक्षेत्र नम्बर २ का निर्वाचन अधिकृत ऋषिराम पौडेलले जानकारी दिए ।
यस क्षेत्रमा राष्ट्रिय स्वतन्त्र पार्टीका झविलाल डुम्रेले २५ हजार ३५४ मत प्राप्त गरेका छन् । नेपाली कांग्रेसका भागवतप्रकाश मल्लले २० हजार ८३० तथा नेकपा एमालेका खिमबहादुर थापाले १४ हजार १०८ मत ल्याएर जमानत जोगाएका छन् ।
तर अन्य उम्मेदवारले भने आवश्यक मत नपाउँदा जमानत जोगाउन सकेनन् । नेकपा (कम्युनिस्ट)का पदमबहादुर विकले ८४८, राष्ट्रिय प्रजातन्त्र पार्टीका रविन पाठकले ५६६, नेशनल रिपब्लिक नेपालका तेजबहादुर थापाले २००, मङ्गोल नेशनल अर्गानाइजेसनका खर्कबहादुर थापाले १३२, राष्ट्रिय जनमोर्चाका राजेन्द्र गैह्रेले ७१, स्वतन्त्र उम्मेदवार खिमबहादुर क्षेत्रीले ६७, राष्ट्रिय जनमुक्ति पार्टीका हरिदेव थापाले ६५, जय मातृभूमि पार्टीका धनबहादुर थापाले १६ तथा स्वतन्त्र सागर थापा मगरले ९ मत मात्रै प्राप्त गरेका छन् ।
निर्वाचन कानुनअनुसार सदर मतको १० प्रतिशत मत प्राप्त गर्न नसक्ने उम्मेदवारको जमानत जफत हुने व्यवस्था रहेको छ ।
