स्याङ्जा निर्वाचन क्षेत्र नम्बर–१ बाट राष्ट्रिय स्वतन्त्र पार्टी (रास्वपा) का डा. धनञ्जय रेग्मी प्रतिनिधिसभा सदस्यमा निर्वाचित भएका छन् । फागुन २१ गते सम्पन्न प्रतिनिधिसभा निर्वाचनको अन्तिम मतपरिणाम अनुसार उनले नेपाली कांग्रेसका उम्मेदवार भरतराज ढकाललाई १० हजारभन्दा बढी मतान्तरले पराजित गरेका हुन् ।

मुख्य निर्वाचन अधिकृत उपेन्द्रप्रसाद गौतमका अनुसार रेग्मीले २९ हजार ७१ मत प्राप्त गर्दा उनका निकटतम प्रतिस्पर्धी ढकालले १८ हजार ८५७ मत पाए। यस निर्वाचन क्षेत्रमा १२ जना उम्मेदवार प्रतिस्पर्धामा थिए ।

भूवैज्ञानिक तथा हिमनदी अध्ययनका विज्ञका रूपमा परिचित रेग्मी स्याङ्जाको पुतलीबजार नगरपालिका–५ का स्थायी बासिन्दा हुन् । उनले जापानको होक्काइडो विश्वविद्यालयबाट सन् २००६ मा ‘माउन्टेन इन्भारोमेन्टल जियोसाइन्स एन्ड जियोलोजी’ विषयमा विद्यावारिधि गरेका छन् । नेपाल पर्यटन बोर्डका पूर्व प्रमुख कार्यकारी अधिकृत (सीईओ) समेत रहेका उनले लामो समय पर्यटन क्षेत्रको नीति तथा व्यवस्थापनमा काम गरेका छन् ।

बोर्डमा रहँदा नेपाललाई अन्तर्राष्ट्रिय पर्यटन बजारमा प्रवर्द्धन गर्ने, नयाँ पर्यटकीय गन्तव्य पहिचान गर्ने र निजी तथा सरकारी क्षेत्रबीच सहकार्य बढाउने काममा उनले नेतृत्व गरेका थिए । कोभिड–१९ पछि पर्यटन क्षेत्र पुनर्जीवनका लागि तयार पारिएको रणनीतिमा पनि उनको सक्रिय भूमिका रहेको बताइन्छ । हाल उनी तालको पानी घटाएर जलविद्युत् उत्पादन गर्ने नयाँ प्रविधिमा समेत काम गरिरहेका छन् ।

करिब छ महिनाअघि मात्रै सक्रिय राजनीतिमा प्रवेश गरेका रेग्मी चुनावअघि स्याङ्जाका गाउँ–गाउँ पुगेर स्थानीय समस्या बुझ्ने अभियानमा व्यस्त थिए । पर्यटन क्षेत्रका जानकार र शिक्षित उम्मेदवारका रूपमा उनी सुरुदेखि नै बलिया प्रतिस्पर्धी मानिएका थिए ।

निर्वाचन अभियानका क्रममा उनले स्याङ्जा–१ लाई कृषि र पर्यटनको सम्भावना उपयोग गर्दै रोजगारी सिर्जना गर्ने समृद्ध क्षेत्रका रूपमा विकास गर्ने योजना अघि सारेका थिए । ग्रामीण पर्यटन विस्तार, होमस्टे प्रवर्द्धन, युवालाई उद्यमशीलतामा जोड्ने तथा आधारभूत पूर्वाधार विकासलाई प्राथमिकतामा राख्ने उनको एजेन्डा थियो । साथै सिद्धार्थ राजमार्ग स्तरोन्नति, मल कारखाना सञ्चालन र ढुंगा उद्योग स्थापना जस्ता योजनाको पनि उनले चर्चा गरेका थिए ।

यस पटकको परिणामलाई स्याङ्जा–१ को राजनीतिक इतिहासमा विशेष रूपमा हेरिएको छ । बहुदलपछिको निर्वाचन इतिहासमा यहाँ कांग्रेस र एमाले बाहेकका उम्मेदवारले पहिलो पटक जित निकालेका हुन् । यसअघि भएका सबै निर्वाचनमा यी दुई दलका उम्मेदवारले मात्रै विजय हासिल गर्दै आएका थिए ।

२०७९ सालमा कांग्रेसका राजु थापा निर्वाचित भएका थिए भने त्यसअघि २०७४ मा एमालेका नारायण मरासिनी विजयी भएका थिए । त्यसअघि २०७० मा कांग्रेसका राजु थापा, २०६४ मा एमालेका हितकाजी गुरुङ, २०५६ मा पनि गुरुङ, २०५१ को मध्यावधि निर्वाचनमा एमालेका त्रिलोचन ढकाल र २०४८ मा कांग्रेसका गोपालमान श्रेष्ठ निर्वाचित भएका थिए ।

निर्वाचन जितेपछि रेग्मीले जनताले उठाएका समस्या समाधानलाई प्राथमिकतामा राखेर काम गर्ने बताएका छन् । उनले खानेपानी, सडक, बिजुली तथा बाँदर आतंकजस्ता स्थानीय समस्याको समाधानका लागि पहल गर्ने प्रतिबद्धता व्यक्त गरे ।

स्याङ्जा–१ मा हरिनास, अर्जुनचौपारी, आँधीखोला र फेदीखोला गाउँपालिका, पुतलीबजार नगरपालिका, भीरकोट नगरपालिका (वडा १–४) तथा वालिङ नगरपालिका (वडा ३ र ४) का मतदाताले मतदान गरेका थिए ।

निर्वाचन कार्यालय स्याङ्जाका अनुसार यस क्षेत्रमा कुल १ लाख ३० हजार ८८६ मतदाता रहेकामा ७० हजार ९४४ मत खसेको थियो । त्यसमध्ये २ हजार ९०८ मत बदर भएको जनाइएको छ ।