स्याङ्जा जिल्लामा ग्रामीण सडकमा बढ्दो सवारी चाप र सम्भावित दुर्घटनालाई लक्षित गर्दै ट्राफिक प्रहरीले विशेष सचेतनामूलक अभियान सुरु गरेको छ ।
जिल्ला ट्राफिक प्रहरी कार्यालय स्याङ्जाको पहलमा सञ्चालनमा ल्याइएको ‘सुरक्षित ग्रामीण सडक यात्रा’ कार्यक्रमले गाउँसम्म ट्राफिक अनुशासनको सन्देश पुर्याउने लक्ष्य लिएको छ ।
सहरी क्षेत्रमा जस्तो नियमित निगरानी ग्रामीण सडकमा सम्भव नहुँदा सवारी साधनको अवस्था, चालकको व्यवहार र नियम पालनामा कमजोरी देखिने भएकाले अभियान आवश्यक परेको जिल्ला ट्राफिक प्रहरी कार्यालय स्याङ्जाका प्रमुख प्रहरी नायब निरीक्षक नरेन्द्रबहादुर शाहीले बताए ।
कार्यक्रम अन्तर्गत गाउँ–गाउँमा पुगेर चालक, सहचालक तथा यात्रुहरूलाई ट्राफिक नियम, सवारीको मर्मत अवस्था र सुरक्षित यात्राबारे जानकारी दिइँदैछ ।
जिल्ला ट्राफिक प्रहरी कार्यालय स्याङ्जाका प्रमुख शाहीले ग्रामीण क्षेत्रमा हुने साना लापरबाहीले समेत ठूलो दुर्घटना निम्त्याउने भएकाले समयमै सचेतना फैलाउन अभियान सुरु गरिएको बताए ।
उनले भने, “हामी सबै ठाउँमा स्थायी रूपमा उपस्थित हुन सक्दैनौं, त्यसैले प्रत्येक सडक प्रयोगकर्ताले आफैं जिम्मेवार बन्नु आवश्यक छ । नियम पालना गर्ने बानीले नै दुर्घटना धेरै हदसम्म रोक्न सक्छ ।”
अभियानअन्तर्गत विभिन्न ग्रामीण सडक खण्डमा कार्यक्रम गरिने योजना रहेको बताउँदै स्याङ्जा ट्राफिक प्रहरीले स्थानीय तह, विद्यालय, यातायात व्यवसायी र सर्वसाधारणसँग सहकार्य गर्दै सचेतना फैलाउने जनाएको छ ।
कार्यक्रममार्फत सवारी साधनको प्राविधिक अवस्था जाँच गर्न प्रेरित गर्ने, चालकलाई जिम्मेवार बनाउने, यात्रुमा सचेतना बढाउने र सडक प्रयोगकर्ताबीच अनुशासन कायम गर्ने उद्देश्य राखिएको छ । ग्रामीण सडक पूर्वाधार सुधारमा सम्बन्धित निकायलाई सुझाव दिने कार्यसमेत अभियानको हिस्सा रहने जनाइएको छ ।
स्याङ्जा ट्राफिक प्रहरी प्रमुख शाहीका अनुसार यस्तो कार्यक्रमले सवारी दुर्घटना न्यूनीकरण, जनधनको क्षति कम गर्ने र ट्राफिक प्रहरी तथा सर्वसाधारणबीच सहकार्यको वातावरण बनाउने अपेक्षा गरिएको छ । उनले अभियानलाई प्रभावकारी बनाउन स्थानीय बासिन्दाको साथ र सहभागिता अपरिहार्य रहेको पनि उल्लेख गरे ।
हाल जिल्लाका विभिन्न ग्रामीण सडक खण्डमा कार्यक्रम सुरु भइसकेको छ भने आगामी दिनहरूमा थप स्थानमा विस्तार गरिने ट्राफिक कार्यालयले जनाएको छ ।
