नयाँ वर्ष २०८३ को अवसर पारेर स्याङ्जाको अर्जुनचौपारी गाउँपालिका–१ दारेगौंडामा चौथो खुल्ला वडा स्तरीय पुरुष भलिबल प्रतियोगिता तथा विविध सांस्कृतिक कार्यक्रम आयोजना हुने भएको छ ।
यहाँको गुप्तेश्वर युवा क्लबको आयोजनामा वैशाख १ गतेदेखि सुरु हुने प्रतियोगिता वैशाख ७ गतेसम्म सञ्चालन हुनेछ ।
प्रतियोगितामा उत्कृष्ट प्रदर्शन गर्ने टिम तथा खेलाडीका लागि आकर्षक पुरस्कारको व्यवस्था गरिएको खेल संयोजक शेर बहादुर परियारले जानकारी दिए ।
प्रतियोगिताको विजेताले ६१ हजार १ सय ११ रुपैयाँसहित ट्रफी र मेडल प्राप्त गर्नेछ भने उपविजेताले ४१ हजार १ सय ११ रुपैयाँसहित ट्रफी र मेडल पाउनेछ । तेस्रो हुने टिमलाई २१ हजार १ सय ११ रुपैयाँ र सान्त्वना स्थान हासिल गर्ने टिमलाई ११ हजार रुपैयाँसहित ट्रफी र मेडल प्रदान गरिने खेल संयोजक परियारले बताए ।
त्यसैगरी, उत्कृष्ट खेलाडी, उत्कृष्ट स्पाइकर, उत्कृष्ट डिफेण्डर, उत्कृष्ट क्विकर र उत्कृष्ट सेटरलाई पनि ट्रफी र मेडल प्रदान गरिने आयोजकले जनाएको छ ।
प्रतियोगितासँगै सांस्कृतिक कार्यक्रमसमेत आयोजना गरिने भएकाले स्थानीयस्तरमा खेलकुद र संस्कृतिको प्रवर्द्धन हुने विश्वास गरिएको क्लबका अध्यक्ष हिमेश परियारले बताए ।
