स्याङ्जाको चापाकोट नगरपालिका–९ सुन्तलीटारस्थित गंगालाल माध्यमिक विद्यालयको खेलमैदानमा पहिलो पटक ‘चापाकोट क्रिकेट लिग’ आयोजना हुने भएको छ ।
‘मुन लाइट ग्रुप’को नाममा हुन लागेको प्रतियोगिता चापाकोट नगर क्रिकेट संघले नगरपालिकाको संरक्षकत्वमा सञ्चालन गर्न लागेको हो ।
प्रतियोगिता यही वैशाख २६ गतेदेखि जेठ २ गतेसम्म चल्नेछ । प्रतियोगितामा जिल्लाभित्रका पाँच टोलीको सहभागिता रहनेछ भने अक्सनमार्फत देशभरका खेलाडीलाई समेत समावेश गरिने व्यवस्था गरिएको संघका अध्यक्ष प्रेमनारायण रेग्मीले जानकारी दिए ।
उनका अनुसार खेल टी–ट्वान्टी ढाँचामा राउन्ड रोबिन प्रणालीमा खेलाइनेछ । प्रतियोगितामा शीर्ष स्थानमा रहने टोली सिधै फाइनलमा पुग्नेछ भने दोस्रो र तेस्रो स्थानका टोलीबीच सेमिफाइनल खेल हुनेछ ।
प्रतियोगिताको विजेताले एक लाख १० हजार रुपैयाँ र उपविजेताले ६० हजार रुपैयाँ नगदसहित शिल्ड, मेडल र प्रमाणपत्र प्राप्त गर्नेछन् । साथै उत्कृष्ट खेलाडी र विधागत पुरस्कारहरू पनि प्रदान गरिने जनाइएको छ ।
खेलमा युवा प्रतिभालाई अवसर दिने उद्देश्यले प्रत्येक टोलीमा एक जना अन्डर–१६ र एक जना अन्डर–१९ खेलाडी अनिवार्य रूपमा समावेश गर्नुपर्ने नियम राखिएको आयोजकले जनाएको छ ।
स्थानीय स्तरमा क्रिकेटको विकास र खेलाडीको क्षमता अभिवृद्धि गर्ने लक्ष्यसहित प्रतियोगिता आयोजना गरिएको अध्यक्ष रेग्मीले बताए । प्रतियोगिताबाट करिब १५ लाख रुपैयाँ आम्दानी हुने र झण्डै १० लाख रुपैयाँ खर्च भई बाँकी रकम खेलकुद क्षेत्रमा लगानी गरिने आयोजकको अनुमान छ ।
