स्याङ्जाको चापाकोट नगरपालिका–९ स्थित गंगालाल माध्यमिक विद्यालयको खेलमैदानमा आजदेखि ‘मुन लाइट ग्रुप’ प्रथम चापाकोट क्रिकेट लिग सुरु हुँदैछ । स्थानीय स्तरमा क्रिकेट गतिविधि विस्तार गर्ने उद्देश्यसहित चापाकोट नगर क्रिकेट संघले प्रतियोगिता आयोजना गरेको हो ।
चापाकोट नगरपालिकाको संरक्षकत्वमा सञ्चालन हुने प्रतियोगिताको उद्घाटन खेल दिउँसो १२ बजे ह्वाइट हर्ष र साँखर वरियरबीच हुने संघका अध्यक्ष प्रेमनारायण रेग्मीले जानकारी दिए ।
उद्घाटन खेलमै राष्ट्रियस्तरको अनुभव बोकेका खेलाडीहरू मैदानमा उत्रिने भएका छन् । ह्वाइट हर्षबाट यू–१९ राष्ट्रिय टोलीका पूर्वखेलाडी अपराजित पौडेल खेल्नेछन् भने साँखर वरियरमा यू–१९ राष्ट्रिय टोलीबाट खेलिसकेका सुभाष भण्डारी रहनेछन् । भण्डारी नेपाल प्रिमियर लिगमा विराटनगर किङ्सबाट दुई सिजन खेलिसकेका खेलाडी हुन् ।
टी–ट्वान्टी ढाँचामा रोविन लिग प्रणालीअनुसार सञ्चालन हुने प्रतियोगिता जेठ २ गतेसम्म चल्नेछ । लिग चरणपछि शीर्ष स्थानमा रहने टोली सिधै फाइनलमा पुग्नेछ भने दोस्रो र तेस्रो स्थानमा रहने टोलीबीच सेमिफाइनल खेल हुनेछ ।
प्रतियोगितामा ह्वाइट हर्ष, गण्डकी फायर, साँखर वरियर, कुवाकोट युथ स्टार र रोयल आँधीखोला गरी पाँच टोलीको सहभागिता रहेको छ ।
प्रतियोगिताको विजेताले एक लाख १० हजार रुपैयाँ नगदसहित शिल्ड, मेडल र प्रमाणपत्र प्राप्त गर्नेछ भने उपविजेताले ६० हजार रुपैयाँसहित ट्रफी, मेडल र प्रमाणपत्र पाउने आयोजकले जनाएको छ । उत्कृष्ट खेलाडी तथा विभिन्न विधामा पनि पुरस्कार प्रदान गरिने अध्यक्ष रेग्मीले बताए ।
स्थानीय तहमा क्रिकेटप्रति आकर्षण बढाउँदै नयाँ खेलाडी उत्पादन गर्ने लक्ष्यसहित प्रतियोगिता आयोजना गरिएको आयोजकको भनाइ छ ।
