स्याङ्जाको भीरकोट नगरपालिकाका दुई सामुदायिक विद्यालयले कम्प्युटर शिक्षा विस्तारका लागि नयाँ सहयोग प्राप्त गरेका छन् । नेपाल लाइफ इन्स्योरेन्स कम्पनी लिमिटेडले संस्थागत सामाजिक उत्तरदायित्व (सीएसआर) कार्यक्रमअन्तर्गत १२ थान कम्प्युटर उपलब्ध गराएको हो ।
कम्प्युटर सहयोग भीरकोट–६ स्थित भाग्योदय माध्यमिक विद्यालय र भीरकोट–८ को पब्लिक एकेडेमी माध्यमिक विद्यालयलाई गरिएको हो । विशेष कुरा के छ भने, यो सहयोग जुटाउन नेपाल लाइफका चिफ फाइनान्स अफिसर चार्टर्ड एकाउन्टेन्ट प्रेम रेग्मी र इन्जिनियर उज्ज्वल रेग्मीले पहल गरेका थिए । दुवै जना भाग्योदय माध्यमिक विद्यालयका पूर्वविद्यार्थी समेत हुन् ।
नेपाल लाइफ इन्स्योरेन्स कम्पनीको वालिङ शाखाका प्रमुख देवीप्रसाद न्यौपानेका अनुसार भाग्योदय माध्यमिक विद्यालयलाई ७ थान र पब्लिक एकेडेमी माध्यमिक विद्यालयलाई ५ थान कम्प्युटर हस्तान्तरण गरिएको छ ।
कम्प्युटर हस्तान्तरण कार्यक्रममा बोल्दै नेपाल लाइफका गण्डकी प्रदेश प्रमुख सहदेव अधिकारीले सामुदायिक विद्यालयमा प्रविधिमैत्री शिक्षाको पहुँच बढाउन कम्पनीले सहयोग गर्दै आएको बताए । उनका अनुसार कम्पनीले सामाजिक उत्तरदायित्व कार्यक्रममार्फत विद्यालयलाई कम्प्युटर, स्टेशनरी सामग्री तथा झोला वितरण गर्नुका साथै ट्राफिक प्रहरीलाई समेत कम्प्युटर र प्रिन्टरलगायतका सामग्री उपलब्ध गराउँदै आएको छ ।
कार्यक्रममा इन्जिनियर उज्ज्वल रेग्मीले आफूले अध्ययन गरेको विद्यालय र आफ्नै गाउँठाउँका विद्यार्थीका लागि सहयोग जुटाउन पाउँदा खुशी लागेको बताए । उनले सामुदायिक विद्यालयको शैक्षिक गुणस्तर सुधार र स्थानीय विकासका लागि सबै क्षेत्रको सहकार्य आवश्यक रहेको धारणा राखे ।
नेपाल लाइफले गण्डकी प्रदेशका विभिन्न जिल्लाका विद्यालयमा यसअघि नै ५ सय ७६ थान झोला र ३ हजार ४ सय ५६ थान कापी वितरण गरिसकेको प्रदेश प्रमुख अधिकारीले जानकारी दिए ।
विद्यालयमा कम्प्युटर थपिएसँगै विद्यार्थीलाई सूचना प्रविधिसम्बन्धी शिक्षा व्यवहारिक रूपमा सिकाउन सहज हुने विश्वास विद्यालय पक्षले गरेको छ ।
