देशका तराईका विभिन्न स्थानमा पछिल्ला दिनमा देखिएको विषम परिस्थितिका बीच सामाजिक तथा धार्मिक सद्भाव, सहिष्णुता र राष्ट्रिय एकताको सन्देश फैलाउने उद्देश्यले स्याङ्जा सदरमुकाममा आइतबार सामाजिक सद्भाव र्याली निकालिएको छ ।
लक्ष्मी स्मृति सामुदायिक पुस्तकालय, रेडियो स्याङ्जा र स्याङ्जा टेलिभिजनको संयुक्त आयोजनामा भएको र्याली पुतलीबजार नगरपालिका–१ स्थित पुस्तकालय परिसरबाट सुरु भई स्याङ्जा बजार परिक्रमा गर्दै शहीद चोकमा पुगेर कोणसभामा परिणत भएको थियो ।
कोणसभालाई सम्बोधन गर्दै लक्ष्मी स्मृति सामुदायिक पुस्तकालयका वरिष्ठ उपाध्यक्ष विश्वराज मरासिनीले सामाजिक तथा धार्मिक सहिष्णुताको संरक्षण आजको आवश्यकता भएको बताए । उनले विविधताबीचको एकता, पारस्परिक सम्मान र सहअस्तित्वलाई थप मजबुत बनाउन सबै पक्ष एकजुट हुनुपर्नेमा जोड दिए ।
संस्थाका कोषाध्यक्ष चन्द्रमणि पौडेलले सामाजिक सद्भाव कायम राख्नु प्रत्येक नागरिकको साझा दायित्व भएको उल्लेख गर्दै कुनै पनि प्रकारका विभाजनकारी गतिविधिबाट समाजलाई जोगाउन सबैले जिम्मेवार भूमिका निर्वाह गर्नुपर्ने बताए ।
त्यसैगरी संस्थाका प्रमुख व्यवस्थापक एकबहादुर गोदार (रमेश) ले राष्ट्रिय एकता र सामाजिक सद्भाव कायम राख्न नागरिकको सकारात्मक सोच र सक्रिय सहभागिता आवश्यक रहेको बताए । उनले सामाजिक एकता बलियो भए मात्रै समाजमा शान्ति र स्थायित्व कायम रहने धारणा व्यक्त गरे ।
र्याली तथा कोणसभामा पत्रकार, बुद्धिजीवी, समाजसेवी, जनप्रतिनिधि तथा सर्वसाधारणको उल्लेख्य सहभागिता रहेको थियो ।
संस्थाका अनुसार पछिल्ला घटनाक्रमका कारण समाजमा उत्पन्न हुन सक्ने विभाजनकारी प्रवृत्तिलाई निरुत्साहित गर्दै आपसी सद्भाव, धार्मिक सहिष्णुता र राष्ट्रिय एकताको सन्देश प्रवाह गर्ने उद्देश्यले कार्यक्रम आयोजना गरिएको हो ।
