स्याङ्जाका सबै ११ स्थानीय तहले आगामी आर्थिक वर्ष २०८३/८४ का लागि बजेट सार्वजनिक गरेका छन् । जिल्लाका पाँच नगरपालिका र छ गाउँपालिकाले गरी कुल ६ अर्ब ९८ करोड ४२ लाख ८७ हजार ४७३ रुपैयाँ बराबरको बजेट सार्वजनिक गरेका हुन् ।

सार्वजनिक बजेटमध्ये नगरपालिकातर्फ पुतलीबजार नगरपालिका सबैभन्दा ठूलो बजेट ल्याउने स्थानीय तह बनेको छ । नगरपालिकाले ९६ करोड ७३ लाख १६ हजार ४०० रुपैयाँ बराबरको बजेट सार्वजनिक गरेको छ । उक्त बजेटमध्ये ६६ करोड २० लाख ४७ हजार ६०० रुपैयाँ चालूतर्फ तथा ३० करोड ५२ लाख ६८ हजार ८०० रुपैयाँ पूँजीगततर्फ विनियोजन गरिएको छ ।

वालिङ नगरपालिकाले आगामी आर्थिक वर्षका लागि ८९ करोड १ लाख ५९ हजार ७३६ रुपैयाँ बजेट सार्वजनिक गरेको छ । यसमध्ये ६२ करोड ४७ लाख ११ हजार ७३६ रुपैयाँ चालूतर्फ र २६ करोड ५४ लाख ४८ हजार रुपैयाँ पूँजीगततर्फ छुट्याइएको छ ।

यस्तै, गल्याङ नगरपालिकाले ८६ करोड ६३ लाख ५० हजार रुपैयाँ बराबरको बजेट ल्याएको छ । नगरपालिकाले ६२ करोड १५ लाख ५० हजार रुपैयाँ चालूतर्फ र २४ करोड ४८ लाख रुपैयाँ पूँजीगततर्फ विनियोजन गरेको जनाएको छ ।

चापाकोट नगरपालिकाले ६६ करोड ४८ लाख ७४ हजार ७२ रुपैयाँको बजेट सार्वजनिक गरेको छ । बजेटमा ४१ करोड १३ लाख २७ हजार ४७२ रुपैयाँ चालूतर्फ तथा २२ करोड ३५ लाख ४६ हजार ६०० रुपैयाँ पूँजीगततर्फ विनियोजन गरिएको छ ।

त्यस्तै, भीरकोट नगरपालिकाले ५७ करोड ३० लाख ९७ हजार ८८१ रुपैयाँ बराबरको बजेट सार्वजनिक गरेको छ ।

गाउँपालिकातर्फ आँधीखोला गाउँपालिका सबैभन्दा बढी बजेट ल्याउने स्थानीय तह बनेको छ । गाउँपालिकाले ६१ करोड ६२ लाख रुपैयाँ बराबरको बजेट सार्वजनिक गरेको छ । यसमध्ये १८ करोड ५० लाख रुपैयाँ पूँजीगततर्फ विनियोजन गरिएको छ भने बाँकी रकम चालूतर्फ खर्च हुने जनाइएको छ ।

कालीगण्डकी गाउँपालिकाले आगामी आर्थिक वर्षका लागि ५६ करोड ८१ लाख ८१ हजार रुपैयाँ बजेट ल्याएको छ । गाउँपालिकाले कुल बजेटको ७० प्रतिशत चालूतर्फ र ३० प्रतिशत पूँजीगततर्फ खर्च गर्ने व्यवस्था गरेको जनाएको छ ।

बिरुवा गाउँपालिकाले ५१ करोड ६२ लाख ६८ हजार ३८४ रुपैयाँको बजेट सार्वजनिक गरेको छ । जसमा ३६ करोड ७२ लाख २१ हजार ३८४ रुपैयाँ चालूतर्फ र १५ करोड ६२ लाख ४७ हजार रुपैयाँ पूँजीगततर्फ विनियोजन गरिएको छ ।

त्यसैगरी, अर्जुनचौपारी गाउँपालिकाले ४७ करोड ९४ लाख २४ हजार रुपैयाँ बराबरको बजेट ल्याएको छ । गाउँपालिकाले ३२ करोड ७० लाख ९० हजार रुपैयाँ चालूतर्फ तथा १५ करोड २३ लाख ३४ हजार रुपैयाँ पूँजीगततर्फ रकम छुट्याएको छ ।

हरिनास गाउँपालिकाले ४४ करोड २४ लाख रुपैयाँको बजेट सार्वजनिक गरेको छ । यसमध्ये ३० करोड ५२ लाख रुपैयाँ चालूतर्फ र १३ करोड ७२ लाख रुपैयाँ पूँजीगततर्फ विनियोजन गरिएको छ ।

फेदीखोला गाउँपालिकाले ४० करोड १६ हजार ४०० रुपैयाँ बराबरको बजेट सार्वजनिक गरेको छ । गाउँपालिकाले ३१ करोड ५० लाख १४ हजार ४०० रुपैयाँ चालूतर्फ तथा ८ करोड ५० लाख २ हजार रुपैयाँ पूँजीगततर्फ बजेट विनियोजन गरेको जनाएको छ ।

स्थानीय तहहरूले सार्वजनिक गरेका बजेटमा सडक पूर्वाधार विकास, कृषि उत्पादन वृद्धि, शिक्षा र स्वास्थ्य सेवा सुधार तथा रोजगारी प्रवर्द्धनका कार्यक्रमलाई प्राथमिकतामा राखिएको छ । आगामी आर्थिक वर्षमा स्थानीय विकास र सेवा प्रवाहलाई प्रभावकारी बनाउने लक्ष्यसहित बजेट ल्याइएको जनाइएको छ ।