स्याङ्जाको फेदीखोला गाउँपालिका–२ मा मापदण्डविपरीत निर्दयी ढंगले चौपाया ढुवानी गरिरहेको आरोपमा एक जनालाई प्रहरीले पक्राउ गरेको छ ।

पक्राउ पर्नेमा पर्साको वीरगञ्ज महानगरपालिका–३२ निवासी ४२ वर्षीय अब्दुल रहीम अन्सारी रहेका छन् । उनी चौपायाका जिम्मेवार धनी रहेको प्रहरीको भनाइ छ ।

प्रहरीले स्याङ्जाको गल्याङबाट काठमाडौंतर्फ जाँदै गरेको प्रदेश नम्बर २–०३००१ ख ६३४१ नम्बरको ट्रकमा २० वटा भैंसी तथा पाडा राखेर पशु ढुवानीसम्बन्धी मापदण्ड उल्लंघन गरेको अवस्थामा फेला पारेको हो ।

जिल्ला प्रहरी कार्यालय स्याङ्जाका सूचना अधिकारी तथा प्रहरी नायब उपरीक्षक रमेशदत्त अवस्थीका अनुसार असार २५ गते साँझ करिब ६ बजे फेदीखोला गाउँपालिका–२ स्थित सिद्धार्थ राजमार्गमा प्रहरी चौकी फेदीखोलाको टोलीले नियमित सवारी चेकजाँचका क्रममा उक्त ट्रक रोकेको थियो ।

चेकजाँचका क्रममा ट्रकमा रहेका २० वटा भैंसी तथा पाडालाई तोकिएको मापदण्डविपरीत कष्ट हुने गरी ढुवानी गरिएको पाइएपछि ट्रकसहित सबै चौपाया नियन्त्रणमा लिइएको उनले बताए ।

घटनामा संलग्न रहेको आरोपमा पक्राउ परेका अन्सारीविरुद्ध प्रहरीले पशुपक्षीसम्बन्धी कसुरमा अनुसन्धान अघि बढाएको छ । यसका लागि जिल्ला प्रशासन कार्यालय स्याङ्जाबाट सात दिनको म्याद थप अनुमति प्राप्त भएको र घटनाबारे थप अनुसन्धान जारी रहेको प्रहरी नायब उपरीक्षक अवस्थीले जानकारी दिए ।