रोटरी क्लब अफ नक्साल शक्तिले स्याङ्जाको फेदीखोला गाउँपालिकामा वृक्षारोपण तथा निःशुल्क स्वास्थ्य शिविर सञ्चालन गरेको छ । क्लबको पहलमा फेदीखोला गाउँपालिका–१ मा वातावरण संरक्षण र सामाजिक सेवालाई जोड दिँदै कार्यक्रम आयोजना गरिएको हो ।
कार्यक्रमअन्तर्गत फेदीखोलाको रामकोट क्षेत्रमा विभिन्न जातका फलफूल तथा बहुमूल्य वनस्पतिका १५० बिरुवा रोपिएको छ । वृक्षारोपण कार्यक्रममा वडा नम्बर १ का वडाध्यक्ष अमृत क्षेत्रीले रोपिएका बिरुवाको संरक्षण र नियमित हेरचाह गर्ने प्रतिबद्धता व्यक्त गरे ।
वृक्षारोपणपछि फेदीखोला गाउँपालिकास्थित अमोर सेवा नेपाल बालगृहमा आश्रित करिब ६० जना बालबालिकाको निःशुल्क स्वास्थ्य परीक्षण गरिएको थियो ।
रोटरी क्लब अफ नक्साल शक्तिका अध्यक्ष कृष्ण पौडेलका अनुसार गण्डकी मेडिकल कलेज पोखराको प्राविधिक सहयोगमा दाँत तथा सामान्य स्वास्थ्य परीक्षण सेवा प्रदान गरिएको हो । शिविरमा विशेषज्ञ स्वास्थ्यकर्मीले बालबालिकाको स्वास्थ्य अवस्था परीक्षण गर्नुका साथै आवश्यक परामर्शसमेत दिएका थिए ।
बालगृहकी अध्यक्ष कमला पराजुलीले स्वास्थ्य परीक्षणमा खटिएका चिकित्सक तथा स्वास्थ्यकर्मी, वृक्षारोपणमा सहभागी स्वयंसेवक र कार्यक्रम आयोजना गर्ने रोटरी क्लबप्रति आभार व्यक्त गरिन् । उनले यस्ता सामाजिक कार्यक्रमले बालबालिकाको स्वास्थ्य र संरक्षणमा सकारात्मक सहयोग पुग्ने बताइन् ।
वृक्षारोपण तथा स्वास्थ्य शिविरमा क्लबका पदाधिकारी, सदस्य तथा स्थानीयवासीको उल्लेख्य सहभागिता रहेको थियो ।
रोटरी क्लब अफ नक्साल शक्तिले समुदायमा आधारित सामाजिक सेवाका कार्यक्रमलाई निरन्तरता दिने जनाएको छ । आगामी दिनमा वृक्षारोपण, दुर्गम क्षेत्रका विपन्न परिवारलाई लक्षित निःशुल्क स्वास्थ्य शिविर, दन्त तथा बाल स्वास्थ्य परीक्षण, मानसिक स्वास्थ्य सचेतना र विद्यालय केन्द्रित सहयोगका कार्यक्रम सञ्चालन गरिने क्लबले जनाएको छ ।
