स्याङ्जाको गल्याङ नगरपालिका–११ मा बेवारिसे अवस्थामा रहेको भरुवा बन्दुक र त्यससँग सम्बन्धित सामग्री प्रहरीले बरामद गरेको छ ।

बिहीबार साँझ गल्याङ–११ नगरकोट छाउनेपानी क्षेत्रमा ती सामग्री फेला परेका हुन् ।

प्रहरीको गस्ती तथा खोजतलासका क्रममा बेवारिसे अवस्थामा रहेको एक थान बेसाबुत एकनाले भरुवा बन्दुक बरामद गरेको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक रमेश दत्त अवस्थीले जानकारी दिए ।

त्यसैगरी घटनास्थलबाट भरुवा बन्दुकको एक थान नाल र एक थान कारतुसको नालसमेत बरामद गरिएको प्रहरीले जनाएको छ ।

बरामद हतियार तथा सामग्री कसले र के प्रयोजनका लागि त्यहाँ राखेको हो भन्नेबारे अनुसन्धान सुरु गरिएको प्रहरी नायब उपरीक्षक अवस्थीले बताए । प्रहरीले घटनासम्बन्धी थप अनुसन्धान अघि बढाएको समेत जनाएको छ ।