स्याङ्जाको वालिङ नगरपालिकामा अवैध रूपमा बालुवा ओसारपसार गरिरहेको अवस्थामा प्रहरीले एउटा ट्याक्टर नियन्त्रणमा लिएर तीन हजार रुपैयाँ जरिवाना गराएको छ ।

अस्थायी प्रहरी बिट रामबाच्छाबाट खटिएको प्रहरी टोलीले बिहीबार वालिङ नगरपालिका–१ रामबाच्छास्थित सिद्धार्थ राजमार्गमा वालिङबाट बयरघारीतर्फ आउँदै गरेको ग १ त १७६३ नम्बरको ट्याक्टरलाई नियन्त्रणमा लिएको थियो ।

प्रहरीका अनुसार ट्याक्टरमा अवैध रूपमा बालुवा ओसारपसार भइरहेको फेला परेपछि आवश्यक कारबाहीका लागि वालिङ नगरपालिकामा बुझाइएको थियो ।

नगरपालिकाले ट्याक्टरलाई तीन हजार रुपैयाँ जरिवाना गरी छाडेको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक रमेशदत्त अवस्थीले जानकारी दिए ।