लागूऔषध चरेस मुद्दामा २९ वर्षदेखि फरार रहेका स्याङ्जाका एक प्रतिवादी पक्राउ परेका छन् । साविक चण्डीभञ्ज्याङ गाविस–७ का नारायणप्रसाद श्रेष्ठलाई प्रहरीले पाल्पाको तानसेनबाट पक्राउ गरेको हो ।
जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक रमेश दत्त अवस्थीका अनुसार श्रेष्ठलाई असोज १० गते तानसेन नगरपालिका–६ बसपार्कबाट पक्राउ गरिएको हो ।
श्रेष्ठ हाल पाल्पाको तानसेन नगरपालिका–६ मा बस्दै आएका थिए । प्रहरीका अनुसार २०५४ कात्तिक १९ गते पाल्पा प्रहरीले उनको घरकोठामा खानतलासी गर्दा १ किलो २५० ग्राम चरेस बरामद गरेको थियो । त्यसपछि प्रहरी प्रतिवेदनका आधारमा उनीविरुद्ध लागूऔषध मुद्दा दर्ता गरी अनुसन्धान अघि बढाइएको थियो ।
अनुसन्धानपछि २०५६ असार ३० गते पाल्पा जिल्ला अदालतले श्रेष्ठलाई सफाइ दिने फैसला गरेको थियो । उक्त फैसलाविरुद्ध पुनरावेदन परेपछि २०५७ असार १ गते पुनरावेदन अदालत बुटवलले श्रेष्ठलाई ६ महिना कैद सजाय हुने फैसला गरेको थियो ।
प्रहरी हिरासतमा बसेको अवधि कटाउँदा श्रेष्ठले अझै ४ महिना २२ दिन कैद भुक्तान गर्न बाँकी रहेको स्याङ्जा जिल्ला अदालतको अभिलेखमा उल्लेख छ ।
पक्राउ परेका श्रेष्ठलाई कैद सजाय भुक्तानका लागि असोज १२ गते स्याङ्जा जिल्ला अदालतमा पेस गरिएको थियो । अदालतको आदेशपछि उनलाई कैद भुक्तानका लागि कारागार कार्यालय स्याङ्जा पठाइएको जिल्ला प्रहरी कार्यालय स्याङ्जाले जनाएको छ ।
