गत भाद्र १२ गते विघटन भएको स्याङ्जाको पुतलीबजार नगरपालिका –३ स्थित पुण्यशिला आधारभूत विद्यालयको व्यवस्थापन समिती अझैसम्म गठन हुन सकेको छैन ।

सरोकारवालाको मौनता र ढिलासुस्तीका कारण नयाँ समिती चयन हुन नसकेको विद्यालयका चन्दादाता एवम् शुभेच्छुक मोती प्रसाद मरासिनीले बताए । उनका अनुसार, “सबैको स्वामित्व रहने” गरि समिती गठन गर्ने प्रक्रियाले समय खाइरहेको हो । तर, समिती विघटन भएको करिब एक महिना बितिसक्दा पनि निर्णयमा ढिलाइ हुनु सम्बन्धित केही व्यक्तिहरुको “मेरो गोरुको बार्है टक्का” प्रवृत्तिले गर्दा भएको उनको आरोप छ ।

समिती विघटन पछि बसेको एक बैठकमा भने शिक्षक–अभिभावक संघ गठन गर्ने सहमति भएको विद्यालय स्रोतले जनाएको छ । सो संघको संयोजकमा चन्द्र मरासिनीलाई प्रस्ताव गरिएको भए पनि अन्य सदस्य चयन गर्ने विषयमा अझै अन्योल छ ।

विद्यालय व्यवस्थापन समितीको नेतृत्व शून्य रहँदा शैक्षिक क्रियाकलापमा असर पर्न सक्ने चिन्ता स्थानीयमा बढ्दो छ ।