जिल्ला प्रहरी कार्यालय स्याङ्जामा कार्यरत प्राविधिक प्रहरी जवान सुजाता गिरी भदौ महिनाको ‘उत्कृष्ट प्रहरी’ घोषित भएकी छन् ।
गृह मन्त्रालयको सांगठनिक नीति निर्देशनअनुसार कर्तव्यप्रति इमान्दारिता, वफादारी र व्यावसायिक सुझबुझका आधारमा गिरीलाई छनोट गरिएको हो ।
गत भदौ २३ र २४ गते जेन-जेड आन्दोलनका क्रममा स्याङ्जा पुतलीबजार नगरपालिका –१ मा आन्दोलनकारीले विभिन्न कार्यालयमा तोडफोड र आगजनी गर्ने प्रयास गरेको बेला प्रहरी जवान गिरीले महत्वपूर्ण भूमिका निर्वाह गरेकी थिइन् । आन्दोलनकारीलाई सम्झाइ–बुझाइ तितर–बितर गराउँदै, तोडफोड रोक्न र ल्याइएका टायर खोसी आगजनी हुन नदिएर उनले ठूलो मानविय तथा भौतिक क्षति न्यूनीकरण गरेको जिल्ला प्रहरी कार्यालयले जनाएको छ ।
उनको सो साहसिक कार्यलाई मूल्याङ्कन गर्दै ‘उत्कृष्ट प्रहरी छनोट कार्यविधि २०८१’ बमोजिम २०८२ भदौ महिनाको उत्कृष्ट प्रहरी घोषणा गरिएको हो ।
जिल्ला प्रहरी कार्यालय स्याङ्जाका प्रमुख प्रहरी उपरीक्षक दधिराम न्यौपानेले गिरीलाई बधाई दिँदै कर्तव्यनिष्ठ प्रहरी कर्मचारीका रूपमा यो उपलब्धि सम्पूर्ण संस्थाको गौरव भएको उल्लेख गरेका छन् ।
