Syangja Dainik Media
जन्मदिनको अवसरमा मानव सेवा आश्रममा खाद्यान्न सहयोग र स्वास्थ्य सेवा

फजुल खर्च र तामझामसहित जन्मदिन मनाउने प्रचलन बढ्दै गएको बेला, इन्जिनियर हिमान्शु अर्यालले आफ्नो २३औं जन्मदिनलाई सामाजिक उत्तरदायित्वसँग जोडेर मनाएका छन् ।

उनको जन्मोत्सवका अवसरमा खुमा अर्याल फाउन्डेसन स्याङ्जाको आयोजनामा र रोट्र्याक्ट क्लब अफ नक्साल शक्तीको समन्वयमा पोखरा–२५ हेम्जास्थित मानव सेवा आश्रममा खाद्यान्न सहयोग र निशुल्क स्वास्थ्य परीक्षण कार्यक्रम सम्पन्न गरिएको हो ।

कार्यक्रमका क्रममा ५० हजार रुपैयाँ बराबरका चामल, तेल, दाल, चिनी र फलफूल लगायतका खाद्यान्न सामग्री आश्रमलाई हस्तान्तरण गरिएको थियो । साथै, गण्डकी मेडिकल कलेजका चिकित्सक टोलीले आश्रममा रहेका ९२ जनाको नाक–कान–घाँटी, मानसिक स्वास्थ्य लगायतका रोगहरूको निशुल्क स्वास्थ्य परीक्षण तथा परामर्श सेवा प्रदान गरेको डा. कृष्ण पौडेलले जानकारी दिए ।

“फजुल खर्च गरेर बर्थडे मनाउने संस्कार तोड्न सके समाजमा साँचो परिवर्तन आउँछ,” इन्जिनियर अर्यालले भने । “आश्रमतर्फको सानो योगदानले पालनपोषणमा सहयोग होस् भन्ने नै मेरो उद्देश्य हो,” उनले थपे ।

सो अवसरमा फाउन्डेसनकी संस्थापक परिवार सदस्य तथा रोटरी क्लब अफ नक्साल शक्तीकी संस्थापक अध्यक्ष डा. लुना अर्यालले भनिन्, “जन्मदिनमा मनोरञ्जनभन्दा पनि सामाजिक उत्तरदायित्व सम्झिनु सुखद पहल हो ।” उनले हिमान्शुलाई शुभकामना दिँदै यस्तो कार्यले समाजमा सकारात्मक सन्देश फैलाउने विश्वास व्यक्त गरिन् ।

त्यस्तै, रोट्र्याक्ट क्लबका सिजन अर्यालले पनि जन्मदिनको शुभकामना दिँदै सहयोगको निरन्तरता आवश्यक रहेको बताए ।

कार्यक्रमको अध्यक्षता फाउन्डेसनका अध्यक्ष लेखनाथ शर्माले गरेका थिए भने संचालन सल्लाहकार एवं सूचना अभियान केन्द्र स्याङ्जाकी अध्यक्ष बन्दना लम्सालले गरेकी थिइन् ।

ब्राइटर युनिभर्सिटी, बेलायतबाट सिभिल इन्जिनियरिङमा वर्ष २०२३/२४ का ब्याच टपर रहेका हिमान्शु अर्याल अहिले युवा उद्यमीको रूपमा आफ्नो पाइलो मजबुत पार्दै छन् । पारिवारिक प्रेरणासँगै उनी सामाजिक उत्तरदायित्व र नवप्रवर्तनशील सोचका प्रतिनिधि युवाका रूपमा अगाडि बढिरहेका छन् ।

प्रकाशित मिति: बिहीबार, कात्तिक १३, २०८२  १०:२३
प्रतिक्रिया दिनुहोस्
Weather Update