Syangja Dainik Media
वालिङमा मोटरसाइकल विवादपछि कुटपिट, मृत्यु प्रकरणका फरार आरोपी पक्राउ

स्याङ्जाको वालिङ नगरपालिका –५ जर्कोटमा मोटरसाइकल चर्को आवाजमा चलाएको विषयमा भएको विवादले ज्यानमारा रूप लिँदा मृत्यु भएका घटनामा संलग्न थप एक फरार आरोपी ६५ दिनपछि पक्राउ परेका छन् ।

इलाका प्रहरी कार्यालय चापाकोटबाट खटिएको टोलीले फरार आरोपी १९ वर्षीय पर्बत खवासलाई पक्राउ गरेको हो । खवास सोही नगरपालिका –५ काम्तीका स्थायी बासिन्दा हुन् ।

गत मंगलबार पक्राउ परेका उनलाई बुधबार जिल्ला अदालत स्याङ्जामा पेश गरिएको प्रहरीले जनाएको छ । अदालतको आदेशअनुसार उनलाई आज बिहीबार पुर्पक्षका लागि जिल्ला कारागार स्याङ्जा चलान गरिएको सूचना अधिकारी प्रहरी नायब उपरीक्षक प्रसन्न राज चौधरीले जानकारी दिए ।

गत साउन ७ गते राति वालिङ –५ जर्कोटमा मोटरसाइकलको आवाजका कारण भएको विवादमा ३२ वर्षीय ढालबहादुर थापालाई कुटपिट गरी घाइते बनाइएको थियो । उपचारका क्रममा उनको मृत्यु भएपछि प्रहरीले कर्तव्य ज्यान मुद्दा दर्ता गरेको थियो ।

प्रहरी नायब उपरीक्षक तथा सूचना अधिकारी चौधरीका अनुसार यसअघि सो घटनामा संलग्न सात जना प्रतिवादीहरुलाई अनुसन्धानपछि गत असोज २ गते नै कारागार चलान गरिएको थियो ।

प्रकाशित मिति: बिहीबार, कात्तिक १३, २०८२  १९:१८
प्रतिक्रिया दिनुहोस्
Weather Update