जिल्ला प्रहरी कार्यालय स्याङ्जाको अपराध अनुसन्धान शाखामा शाखा प्रमुखको जिम्मेवारी सम्हाल्दै आएका प्रहरी निरीक्षक प्रवेश तिवारी असोज महिनाको ‘उत्कृष्ट प्रहरी (Best Police of the Month)’ घोषित भएका छन् ।

जिल्ला प्रहरी कार्यालय स्याङ्जाका प्रमुख प्रहरी उपरीक्षक दधिराम न्यौपानेका अनुसार प्रहरी निरीक्षक तिवारीले  फैसला कार्यान्वयनदेखि विविध अपराध अनुसन्धानमा उच्च व्यावसायिकता र प्रतिबद्धता प्रदर्शन गर्दै आएका थिए ।

२०८२ असोज महिनामा तिवारीले नियन्त्रित लागूऔषधसहित २ जना व्यक्तिलाई पक्राउ, सुन चोरीमा संलग्न १ जना महिलालाई नियन्त्रण, फरार रहेका १३ जना दोषीलाई पक्राउ गरी १ वर्ष ७ महिना ४ दिन कैद र ११ लाख ७१ हजार २०७ रुपैयाँ जरिवाना असुल गर्न सफल भएका थिए ।

त्यस्तै, जेन-जेड आन्दोलन को क्रममा विभिन्न कारागारबाट फरार भएका ८ जना कैदीलाई पक्राउ गरी कानूनी दायरामा ल्याइएको थियो । साथै, नदिजन्य पदार्थको अवैध उत्खनन र ओसार–पसारमा संलग्न १ वटा जेसिबी र २ वटा ट्याक्टर नियन्त्रणमा लिइएको प्रहरीले जनाएको छ ।

यी सबै कामको सफल नेतृत्व र समर्पणका कारण उनलाई “उत्कृष्ट प्रहरी छनौट कार्यविधि २०८१” बमोजिम असोज महिनाको उत्कृष्ट प्रहरी घोषित गरिएको हो ।

जिल्ला प्रहरी कार्यालय, स्याङ्जाले असोज महिनाको उत्कृष्ट प्रहरी घोषणा गर्दै तिवारीलाई बधाई तथा आगामी जिम्मेवारीमा अझ सफलताको शुभकामना दिएको छ ।