जन्मदिन भनेको केवल उत्सव मात्र होइन, सेवा र सद्भावको क्षण पनि हुन सक्छ भन्ने उदाहरण पुतलीबजारकी सुस्मिता थापाले प्रस्तुत गरेकी छन् ।
स्याङ्जाको पुतलीबजार नगरपालिका –४, रामकोषमा जन्मिएकी र हाल अस्ट्रेलियामा बसोबास गर्दै आएकी थापाले सोमबार आफ्नै जन्मदिनको अवसरमा पुतलीबजार -१४ स्थित पाणिनि संस्कृत गुरुकुलका बटुकहरूका लागि सहयोग गरेकी हुन् ।
गुरुकुलमा अध्ययनरत २० जना बटुकलाई दैनिक उपभोग्य सामग्री, खाद्यान्न र दक्षिणा वितरण गरिएको छ । सो अवसरमा बटुकहरूको लागि विशेष भोजनको पनि व्यवस्था गरिएको थियो ।
भिडियो सन्देशमार्फत भावनात्मक शुभकामना व्यक्त गर्दै सुस्मिताले भनिन्, “मानव भएर जन्मेका छौँ भने मानवसेवा गर्नै पर्छ । सानो सहयोगबाट कसैको जीवनमा राहत पुग्छ भने त्यो नै जन्मदिनको साँचो अर्थ हो ।” नयाँ शैलीमा जन्मदिन मनाउन पाउँदा आफू हर्षित भएको पनि उनले व्यक्त गरिन् ।
