स्याङ्जाको चापाकोट नगरपालिकामा एकदिने बृहत् स्वास्थ्य शिविर हुने भएको छ । सातौं स्थापना दिवसको अवसरमा खुमा अर्याल फाउन्डेसनले मंसिर ५ गते चापाकोट -४ दार्सिङ स्वास्थ्य चौकीमा रक्तदान कार्यक्रमसहित शिविर सञ्चालन गर्ने भएको हो ।
फाउन्डेसनका अध्यक्ष लेखनाथ शर्माले चापाकोट नगरपालिकाको सहकार्य तथा नेपाल रेडक्रस सोसाइटी स्याङ्जा शाखा र गण्डकी मेडिकल कलेज पोखराको प्राविधिक सहयोग रहने जानकारी दिए ।
शिविरमा वरिष्ठ मुटु रोग विशेषज्ञ डा. मधु रोका, वरिष्ठ पेट, छाती, सुगर तथा मुटु रोग विशेषज्ञ डा. युक्त नारायण रेग्मी, वरिष्ठ रेडियोलोजिस्ट डा. केशव शर्मा, वरिष्ठ नाक–कान–घाँटी रोग विशेषज्ञ डा. सञ्जय कोइराला, स्त्रीरोग विशेषज्ञ डा. बिनिता शर्मा, हाडजोर्नी, बाथ तथा छाला रोग विशेषज्ञ डा. ईश्वर कंडेललगायतका चिकित्सकले स्वास्थ्य परीक्षण गर्नेछन् ।
त्यस्तै, नशा रोग विशेषज्ञ डा. रक्षा पाठक, दन्त रोग विशेषज्ञ डा. उज्ज्वल कोइराला, बाल रोग विशेषज्ञ डा. सन्दीप पोख्रेल र जनरल सर्जन डा. आनन्द भट्टराई समेत सेवा प्रदान गर्नेछन् । जटिल केसहरूलाई आवश्यकताअनुसार गण्डकी मेडिकल कलेज पोखरा वा अन्य नजिकका स्वास्थ्य संस्थामा रिफर गरिने फाउन्डेसनले जनाएको छ ।
शिविरमा महिलाका लागि पाठेघरको क्यान्सर जाँचदेखि भिडियो एक्स–रे, मुटुको भिडियो एक्स–रे, इको, इसीजी तथा विविध प्रयोगशाला सेवा निःशुल्क उपलब्ध गराइनेछ । बिहान ९ बजेदेखि अपराह्न ४ बजेपछि सम्म शिविर सञ्चालन हुनेछ । स्वास्थ्य परीक्षणका लागि सबैलाई शिविरमा सहभागी हुन अध्यक्ष शर्माले आग्रह गरेका छन् ।
खुमा अर्याल फाउन्डेसन विगत सात वर्षदेखि सामाजिक तथा राहतमुखी कार्यक्रममार्फत सक्रिय रूपमा काम गर्दै आएको छ । फाउन्डेनसले हरेक वर्ष मंसिर ५ गते स्थापना दिवसको अवसरमा विभिन्न सामाजिक पहलमार्फत दिवस मनाउँदै आएको छ ।
