विश्व बालदिवसको अवसरमा स्याङ्जामा शुक्रबार बालबालिकाबीच पञ्चेबाजा प्रतियोगिता हुने भएको छ । एकीकृत सेवा कार्यालय स्याङ्जाको आयोजनामा हुन लागेको कार्यक्रममा जिल्लाभरिका बालबालिका सहभागि हुने जनाइएको छ ।
बालअधिकारको आवाजलाई संगीतमार्फत् अझ बुलन्द बनाउने र बालबालिकामा लुकेर रहेका प्रतिभालाई पहिचान तथा प्रोत्साहन गर्ने उद्देश्यले कार्यक्रम आयोजना गरिएको कार्यालयका प्रमुख जीवन पौडेलले बताए । उनका अनुसार पञ्चेबाजा संरक्षण, परम्परागत सीपको पुस्तान्तरण र सांस्कृतिक जर्गनामा समेत यसले टेवा पुर्याउने छ ।
हालसम्म विभिन्न स्थानीय तहबाट १० टिमले दर्ता गरिसकेका छन् । कक्षा १ देखि १० सम्मका विद्यार्थीहरू विद्यालय, टोल, क्लब वा समूह बनाएर सहभागी हुन पाउने व्यवस्था गरिएको छ । बालअधिकारसम्बन्धी शब्द समावेश गरी गीत प्रस्तुत गर्ने तथा बाजा उत्कृष्ट बजाउने समूहलाई मूल्यांकनमा प्राथमिकता दिइने तयारी छ ।
प्रतियोगितामा प्रथम, द्वितीय, तृतीय तथा सान्त्वना विजेतालाई क्रमशः १५ हजार, १० हजार, ७ हजार र ४ हजार रुपैयाँसहित प्रमाणपत्र प्रदान गरिनेछ । दमाहा, झ्याली, ट्याम्को, ढोलकी र सनाई उत्कृष्ट बजाउनेलाई समेत विशेष पुरस्कार राखिएको छ ।
कार्यक्रममा लोकदोहोरी गायक लोकनाथ सापकोटा लगायतका कलाकारहरूको विशेष प्रस्तुति रहनेछ । जिल्ला बाल अधिकार समिति र जिल्ला बालसञ्जालको सहयोगमा आयोजना हुने कार्यक्रम पुतलीबजार नगरपालिका –३ स्थित भूपू सैनिक आवासीय माध्यमिक विद्यालयको प्राङ्गणमा हुनेछ ।
यसअघि भदौ २९ गते नै आयोजना हुने बताइएको कार्यक्रम भदौ २३ र २४ गतेको जेन जेड आन्दोलनका कारण स्थगित भएको थियो ।
