सातौँ स्थापना दिवसको अवसरमा खुमा अर्याल फाउन्डेसन स्याङ्जाले चापाकोट नगरपालिका –४ मल्याङ्कोट स्वास्थ्य चौकीमा बृहत् स्वास्थ्य शिविर र रक्तदान कार्यक्रम सम्पन्न गरेको छ ।
चापाकोट नगरपालिकाको समन्वय, गण्डकी मेडिकल कलेज पोखरा र नेपाल रेडक्रस सोसाइटी स्याङ्जाको प्राविधिक सहयोगमा गरिएको शिविरबाट ७२७ जना स्थानीयले सेवा पाएका छन् ।
स्वास्थ्य जाँचमा चापाकोट नगरपालिका –३, ४, ५ का साथै बिरुवा गाउँपालिका –६ र हरिनास गाउँपालिका –५ का स्थानीयको सहभागीता थियो ।
जटिल अवस्थाका बिरामीलाई गण्डकी मेडिकल कलेज पठाइएको र रिफर भएकाले औषधिमा ५ प्रतिशत र सेवामा २० प्रतिशत छुट उपलब्ध गराइने फाउन्डेसनका अध्यक्ष लेखनाथ शर्माको भनाइ छ ।
शिविरमा चापाकोट नगरप्रमुख देवबहादुर खाण ‘ईश्वर’ले फाउन्डेसनको सामाजिक जिम्मेवारीबोध र निरन्तरताको प्रशंसा गर्दै “स्वास्थ्य पहुँचमा फाउन्डेसनले दिएको साथ महत्वपूर्ण छ,” भने । यस्तै, फाउन्डेसनका संस्थापक वरिष्ठ उद्यमी खुमा प्रसाद अर्यालले स्थानीयको साथ र विश्वासले सामाजिक कार्यलाई थप ऊर्जा मिलिरहेको बताए ।
शिविरमा मुटु, पेट, छाती, सुगर, नाक–कान–घाँटी, स्त्रीरोग, हाडजोर्नी, छाला, नशा, दन्त, बालरोग लगायतका सेवाहरू प्रदान गरिएको थियो । त्यस्तै, महिलाका लागि पाठेघर क्यान्सर स्क्रिनिङ, भिडियो एक्स–रे, इको, इसीजीदेखि विभिन्न प्रयोगशाला सेवा पनि सञ्चालनमा थिए । यस्तै, रक्तदान कार्यक्रममा पनि स्थानीयको उपस्थिति रहेको थियो ।
