लैङ्गिक हिंसा विरुद्धको १६ दिने अभियानको अवसरमा शुक्रबार स्याङ्जामा ‘महिला मानवअधिकार रक्षक अन्तराष्ट्रिय दिवस’ विशेष कार्यक्रमसहित मनाइएको छ । अभिमुखिकरण, अन्तरक्रिया र हस्ताक्षर अभियानमार्फत लैङ्गिक हिंसा अन्त्यका लागि संयुक्त प्रतिवद्धता व्यक्त गरिएको छ ।
लैङ्गिक हिंसा उन्मूलन सबैको साझा दायित्व भएको उल्लेख गर्दै गण्डकी प्रदेशसभा सदस्य कल्पना तिवारीले महिलाहरु राजनीतिक तथा आर्थिक अधिकारका लागि अझै संघर्षरत रहे पनि नेतृत्व दिन पूर्ण सक्षम रहेको बताइन् ।
आँधीखोला गाउँपालिका उपाध्यक्ष सिता थापाले न्याय र समानतामा आधारित समाज निर्माणका लागि महिलाहरूको आत्मबल सुदृढ बन्नुपर्नेमा जोड दिइन् ।
सहायक प्रमुख जिल्ला अधिकारी प्रेम सुवेदीले प्रविधिको दुरुपयोगले महिलामाथि नयाँनयाँ प्रकारका हिंसा थपिएको उल्लेख गर्दै कानूनी उपचार र सचेतनाले मात्र समस्याको समाधान सम्भव हुने बताए ।
कोपिला नेपालकी कार्यकारी निर्देशक विना सिलवालले धेरै महिलाहरु ‘समाज के भन्ला’ भन्ने डरले पीडा लुकाउन बाध्य रहेको उल्लेख गर्दै राज्यले उनीहरूको अधिकार सुरक्षित गर्न विशेष प्रबन्ध गर्नुपर्ने बताइन् ।
मानवअधिकार तथा शान्ति समाज स्याङ्जाका अध्यक्ष भवानी अधिकारीले बालिकाहरू भ्रूणकालदेखि नै जोखिममा पर्ने अवस्थाले जन्मसिद्ध अधिकारसमेत खोसिँदो रहेको टिप्पणी गरिन् ।
महिला मानवअधिकार रक्षक सञ्जाल स्याङ्जाकी अध्यक्ष तिलकुमारी रेग्मीले महिलाहरू अझै घरायसी काममै सीमित हुनुपरेको र निरन्तर हुने हिंसालाई कानुनी र सचेतना कार्यक्रमले मात्र न्यूनिकरण गर्न सकिने बताइन् ।
स्याङ्जामा हिंसापीडित महिलाका लागि अल्पकालीन आश्रयस्थल स्थापना गरिएको र कानुनी सहायता, बसोबास तथा पुनर्स्थापनाका कार्यक्रम सञ्चालन भइरहेको एकीकृत सेवा कार्यालय प्रमुख जीवन पौडेलले जानकारी दिए । गण्डकी प्रदेश सरकारले दिर्घकालीन पुनर्स्थापनामार्फत हिंसापीडित महिलालाई आत्मनिर्भर बनाउन अघि बढेको पनि उनले बताए ।
कार्यक्रममा पुतलीबजार, गल्याङ, कालिगण्डकी, अर्जुनचौपारी र फेदीखोला लगायत स्याङ्जाका ११ वटै स्थानीय तहका प्रतिनिधिहरू, महिलाशाखाका कर्मचारी, विद्यालयका शिक्षिका, न्याय क्षेत्रका अधिकारी, आमा समूह, मानवअधिकारकर्मी तथा विद्यार्थीहरूको सहभागिता रहेको थियो ।
कार्यक्रममा भू.पू. सैनिक आवासीय माविकी छात्रा कञ्चनले ‘हामी नारी बोल’ गीतमा प्रस्तुत स्वागत नृत्य कार्यक्रमको आकर्षण बनेको थियो ।
एकिकृत सेवा कार्यालयको आयोजनामा, महिला अधिकारका क्षेत्रमा क्रियाशील विभिन्न सङ्गठनको समन्वयमा जिल्ला समन्वय समिति स्याङ्जाको हलमा सम्पन्न कार्यक्रम गत वर्षदेखि स्याङ्जामा सुरू गरिएको हो । हरेक वर्ष नोभेम्बर २९ का दिन ‘महिला मानवअधिकार रक्षक अन्तराष्ट्रिय दिवस’ मनाइन्छ ।
