स्याङ्जाको कालीगण्डकी गाउँपालिकाले जनसंख्या घट्दो क्रमलाई नियन्त्रण गर्न तीन सन्तान जन्माउने परिवारलाई मासिक चार हजार रुपैयाँ आर्थिक सहायता उपलब्ध गराउने भएको छ ।

जनसंख्याको सन्तुलन कायम गर्न, परिवारलाई सन्तानप्रति सकारात्मक सोच विकास गराउन तथा पोषणमैत्री स्थानीय शासनलाई प्रवर्द्धन गर्ने उद्देश्यले यो निर्णय गरिएको गाउँपालिकाले जनाएको छ ।

 चालू आर्थिक वर्षका लागि लागू गरिएको यो कार्यक्रम “तीन सन्तान जन्माउने परिवारलाई आर्थिक सहायता प्रदान गर्ने कार्यविधि, २०८२” अनुसार कार्यान्वयनमा ल्याइएको गाउँपालिकाका प्रमुख प्रशासकीय अधिकृत भेषराज आचार्यले जानकारी दिए । सोही उद्देश्यअनुसार तोकिएको मापदण्ड पूरा गर्ने परिवारलाई दुई वर्षसम्म मासिक चार हजार रुपैयाँ आर्थिक सहायता उपलब्ध गराइने आचार्यले बताए ।

आचार्यले यो कार्यक्रम दीर्घकालीन सोचका साथ ल्याइएको बताउँदै भने, “गाउँपालिकामा बसोबास गर्ने परिवारलाई सन्तान जन्माउन प्रोत्साहन गर्ने र भविष्यमा जनसंख्याको सन्तुलन कायम गर्ने हाम्रो लक्ष्य हो । कार्यविधि अनुसार योग्य परिवारले आवश्यक कागजातसहित निवेदन दिनुहोस्, प्रक्रिया सरल र पारदर्शी बनाइएको छ ।”

गाउँपालिका अध्यक्ष खिम बहादुर थापाले पनि कार्यक्रमको महत्व औंल्याउँदै भने, “दुई सन्तानलाई सामान्यतः पर्याप्त मानिए पनि पछिल्लो समय धेरै ठाउँमा जनसंख्या घट्दै गएको अवस्था छ । कालीगण्डकीलाई दीर्घकालीन रूपमा जीवन्त बनाइराख्न परिवारमैत्री नीति आवश्यक छ । यो सहयोग रकम मात्र होइन, सन्तानप्रति सकारात्मक सोचको सन्देश पनि हो ।”

थापाले जनसङ्ख्याको वृद्धिदर घट्दै गएकाले स्थानीय तहले यस्तो नीति लिनुपरेको स्पष्ट पार्दै दीर्घकालीन जनसङ्ख्या सन्तुलन र पोषणमैत्री स्थानीय शासनलाई समेत ध्यानमा राखेर कार्यक्रम ल्याइएको बताए ।

कार्यविधिअनुसार कालीगण्डकी गाउँपालिकाभित्र स्थायी बसोबास गर्ने र २०८२ साल श्रावण महिनापछि तेस्रो सन्तान जन्माएका परिवारले सम्बन्धित वडा कार्यालयमा निवेदन पेश गर्नुपर्नेछ । निवेदनका लागि आमाबुवाको नागरिकताको प्रतिलिपी, तीनै सन्तानको जन्मदर्ता प्रमाणपत्र, विवाह दर्ता प्रमाणपत्र र बसाइँ सरी आएको हकमा बसाइँसराइ प्रमाणपत्र कागजात अनिवार्य गरिएको छ । साथै जन्मिएको सन्तान नेपाल सरकारको सूचीकृत स्वास्थ्य संस्थामै जन्मिएको हुनुपर्ने आयोजकले जनाएको छ ।