स्याङ्जाको वालिङ नगरपालिका अहिले फरक शैलीका कारण देशभर चर्चामा छ । ‘गुलाबी सहर’को रूपमा चिनिँदै आएको वालिङमा अब सवारी सेवा पनि त्यही पहिचानसँग जोडिन थालेको छ ।

नगरभित्रका अधिकांश घरधुरीमा गुलाबी रङ पोतिएपछि सहरको दृश्य नै बदलिएको छ । यही पहिचानलाई थप मजबुत बनाउन नगरपालिकाले अटो चालकहरूलाई पनि एउटै रङमा ल्याउने अभियान थालेको हो । हाल सञ्चालनमा रहेका करिब दुई सय अटो चालकलाई गुलाबी ज्याकेट वितरण गरिएको छ ।

यो पहलले अब सडकमा गुड्ने अटो मात्र होइन, चालकको पोशाकले पनि सहरको पहिचान झल्काउने देखिएको छ । ‘स्मार्ट सिटी वालिङ’ लोगो अंकित ज्याकेटले सहरको ब्रान्डिङलाई थप स्पष्ट बनाएको नगरपालिकाको भनाइ छ ।

अभियान सौन्दर्यमा मात्र सीमित नरहेको बताउँदै नगर उपप्रमुख कविता तिवारी गैह्रेले यो अटो चालकलाई दर्ता तथा नवीकरण प्रक्रियामा ल्याउने, सेवा व्यवस्थित गर्ने र राजस्व संकलनलाई प्रभावकारी बनाउने लक्ष्यसहित कार्यक्रम अघि बढाइएको बताइन् । उनले एकरूप पोशाकले चालकहरूबीच अनुशासन र एकता बढ्ने तथा यात्रुमा विश्वास बढ्ने विश्वास व्यक्त गरिन् ।

अटो व्यवसायीहरू पनि यस कदमप्रति सकारात्मक देखिएका छन् । एकरूप पोशाकले यात्रुहरूलाई दर्ता भएका सवारी छुट्याउन सहज हुने र सेवाप्रति विश्वास बढ्ने उनीहरूको भनाइ छ ।

पछिल्लो समय छोटो दूरीका लागि अटो सेवा लोकप्रिय बन्दै गएको छ । वालिङमा पनि दैनिक जीवनसँग जोडिएको यो सेवामा केही अव्यवस्था देखिँदै आएको अवस्थामा नयाँ अभियानले सुधारको संकेत दिएको छ ।

गुलाबी रङले सहरका घर र संरचना मात्र होइन, अब सेवामूलक क्षेत्रलाई पनि एकीकृत गर्न थालेको देखिन्छ । यसले वालिङको समग्र छवि सुधार्न सहयोग पुग्ने अपेक्षा गरिएको छ ।

स्थानीय तहको सक्रियता र व्यवसायीहरूको सहकार्यले सुरु भएको यो प्रयासले भविष्यमा सेवा गुणस्तर, यात्रु विश्वास र राजस्व व्यवस्थापनमा सकारात्मक प्रभाव पार्ने विश्वास लिइएको छ ।