लोकप्रियताका हिसाबले आफ्नो छुट्टै स्थान बनाएकी लोकगायिका ज्योति मगरले बयरघारी रमाइलो मेलामा दर्शकको मन जितेकी छिन् ।
स्याङ्जाको भीरकोट नगरपालिका -१ स्थित सिसौघारी खेलमैदानमा असोज २३ गते उद्घाटन भएको रमाइलो मेलाका सुरुका केहि दिन खासै रौनक देखिएन । तर असोज २९ मा लोकगायिका ज्योति मगरको आगमनले माहोल एक्कासी बदलियो । लोकगायिका मगरले आफ्ना जोशिला प्रस्तुति दिएपछि मेलामा भीड बढ्दै गयो ।
असोज २९ गते मेलाका प्रमुख आकर्षणको रूपमा ज्योति मगरको नाम घोषणा भएपछि मेला एकाएक रोमाञ्चित बन्यो । उनको आगमनसँगै रमाइलो मेलामा जनसागर उर्लियो ।
टाढाटाढाका बस्तीबाट मगरलाई प्रत्यक्ष हेर्न सयौं मानिस बयरघारी बजार आइपुगेका थिए । मगरले करिब एक घण्टासम्म स्टेजमा आफ्नो दमदार प्रस्तुति दिइन् । 'मलाई हेरी हेरी, लठ्ठै पर्यो तन्नेरी.....' बोलको गीतले महोत्सवमा आफ्नो प्रस्तुति सुरु गरेकी मगरले दर्शकलाई भरपूर मनोरञ्जन गराएकी हुन् ।
'कान्छी मुसुक्कै, पैसा भुसुक्कै...', 'चोरी खान पल्केको त्यो ढाडे बिरालो....', 'नाचौंला मादलु तालैमा....', 'उहि मुलाको सिन्की उहि मुलाको चाना....' लगायतका गीत गाएर मगरले रमाइलो मेलामा दर्शकलाई मन्त्रमुग्ध बनाइन् ।
बुधबार रमाइलो मेलामा अमर धिताल, नेत्र खड्का, करिस्मा बिसि, राजेश भण्डारी, रबिन एसके, कार्यक्रम संचालिका समेत रहेकी मुना अर्यालले आआफ्ना प्रस्तुतिबाट दर्शकलाई मनोरञ्जन गराएका थिए । यस्तै, मोडल तथा डान्सर भूमिका पंगेनीले नृत्य प्रस्तुत गरेकी थिइन् ।
बयरघारी पिस युथ क्लबद्वारा आयोजित रमाइलो मेला आगामी कार्तिक २ गतेसम्म चल्नेछ ।
