स्याङ्जाको भीरकोट नगरपालिका – १ र २ को संगमस्थल भीरकोट खेलमैदानमा सञ्चालन भएको चौथो संस्करणको बयरघारी रमाइलो मेला दस दिनको उत्साहपश्चात् सम्पन्न भएको छ । गत असोज २३ गतेदेखि कार्तिक २ गतेसम्म चलेको मेलामा बीस हजार बढी दर्शकले अवलोकन गरेका छन् ।

बयरघारी पिस युथ क्लबको आयोजनामा भएको मेलाको उद्घाटन नेपाली काङ्ग्रेस गण्डकी प्रदेशका उपसभापति मेखलाल श्रेष्ठले गरेका थिए भने समापन भीरकोटका नगर प्रमुख गोविन्द कुमार कर्माचार्यले गरेका थिए । प्रमुख कर्माचार्यले मेलाको शान्तिपूर्ण समापनप्रति खुशी व्यक्त गर्दै भीरकोटको समृद्धिका लागि सहकार्य आवश्यक रहेको बताए ।

रमाइलो मेलामा स्थानीयदेखि राष्ट्रिय स्तरका कलाकारहरु – पवन रोका, भूमिका पंगेनी, मुना अर्याल, राजेश भण्डारी, नेत्र खड्का, ममता तामाङ, कमला सुनार, कमला गैह्रे, राजु ढकाल, राजन कार्की, चोलेन्द्र पौडेल, माया गुरुङ, कृष्णा गुरुङ, राजु गुरुङ, अमर धिताल, ज्योति मगर, पोख्रेली ब्याण्ड र जेम्सी लगायतले धमाकेदार प्रस्तुति दिएका थिए ।

तर मेलाको सुरुवाती दिनहरुमा भीरकोट उद्योग वाणिज्य संघले व्यापारिक स्टल राख्न नदिन गरेको प्रयासले विवाद जन्माएको थियो । उद्घाटनको दिन दर्शकको उपस्थिति कमजोर भए पनि, पछि भने दर्शकको उत्साहले मेलालाई रंगीन बनायो । स्थानीयहरुले उद्योग वाणिज्य संघको “मेला विरोध” कदमलाई दर्शकको उत्सवमाथिको ठट्टा भनेर आलोचना गरेका छन् ।

समापन समारोहमा क्लबका अध्यक्ष रोशन गुरुङले मेला सफल बनाउन सहयोग गर्ने सबैलाई धन्यवाद दिँदै मेला असफल बनाउने प्रयास गर्ने समूहलाई भीरकोटमा भविष्यमा कुनै मेला/महोत्सव गर्न नदिने चेतावनी समेत दिएका थिए ।

उक्त समारोहमा विद्यालय, आमा समूह, सञ्चारकर्मी, कलाकार, सुरक्षाकर्मी र सहयोगीहरुलाई सम्मान गरिएको थियो ।

रमाइलो मेलामा करिब ८० वटा व्यापारिक स्टल रहेको र करिब एक करोड रुपैयाँ बराबरको आर्थिक कारोबार भएको क्लबका अध्यक्ष गुरुङले बताए ।