तिहारको रमझम, देउसी भैलोको लय र बाजाको ताल—यी सबैको संगम अहिले स्याङ्जामा देखिएको छ ।
शहरीकरण र आधुनिकताले मौलिक परम्पराहरु बिस्तारै ओझेलमा परिरहेका बेला स्याङ्जाको पुतलीबजार नगरपालिका -४ ठुलीबेसिका केटाकेटीले भने परम्परालाई जोगाउँदै, पढाई खर्च समेत जुटाउने नयाँ बाटो खोजेका छन् ।
सन्तोष परियारको नेतृत्वमा बनेको बालक समूहले यस वर्षको तिहारमा बाजासहित देउसी भैलो खेल्दै घरघर पुगिरहेका छन् । तर, उनीहरूको उद्देश्य मनोरञ्जन मात्र होइन, त्यसबाट आर्जित रकमले आफ्नो पढाई खर्च जोहो गर्ने पनि हो ।
“हाम्रो सिप पनि देखियो, कला पनि निखरियो, साथै पढाई खर्च पनि जुट्छ,” सन्तोषले मुस्कुराउँदै भने । उनका अनुसार बाजाबाट देउसी भैलो खेल्दा नौलो महसुस हुने भएकाले गाउँभरिका बासिन्दा हेर्नै भएपनि आउने गरेका छन् ।
बढ्दो आधुनिक प्रवृत्तिमा हराउँदै गएको मौलिक देउसी भैलोलाई बालकहरुले पुनर्जीवित गर्न थालेको यो प्रयासले स्याङ्जामा तिहारको रंग रौनक अझै बढाएको छ । भाइटिकाको दिनसम्म निरन्तर देउसी खेल्ने योजनामा रहेका उनीहरूलाई गाउँलेले उत्साहपूर्वक साथ दिइरहेका छन् ।
परम्परा र आवश्यकता दुवैलाई जोड्ने यस्तो पहलले न केवल तिहारको मौलिकता जोगाएको छ, बरु बालकहरूमा आत्मनिर्भरताको नयाँ सन्देश पनि दिएको छ ।
