स्याङ्जाकी लोकदोहोरी गायिका बत्तीकुमारी थापाले ‘दोस्रो गण्डकी लोकतारा २०८३’ को उपाधि जितेकी छन् । पोखरामा आयोजित प्रतियोगितामा उनले अन्य १० प्रतिस्पर्धीलाई पछि पार्दै पहिलो स्थान हात पारेकी हुन् ।

उपाधिसँगै बत्तीले ५५ हजार ५ सय ५५ रुपैयाँ नगद, ट्रफी, मेडल र प्रमाणपत्र प्राप्त गरेकी छन् । साथै सर्जक रमेश बिजीको शब्द तथा लयमा नि:शुल्क अडियो गीत रेकर्ड गर्ने अवसर पनि पाएकी छन् ।

प्रतियोगितामा लमजुङका युगेश परियार दोस्रो बने भने बागलुङकी ललिता घर्तीमगर तेस्रो भइन् । कास्कीका समिर पुनले सान्त्वना पुरस्कार प्राप्त गरेका छन् ।

दोस्रो हुने प्रतियोगीले ३३ हजार ३ सय ३३ रुपैयाँ नगदसहित ट्रफी, मेडल र प्रमाणपत्रका साथमा नि:शुल्क अडियो गीत रेकर्ड गर्ने अवसर प्राप्त गरेका छन् । तेस्रो हुनेलाई २२ हजार २ सय २२ रुपैयाँ तथा सान्त्वना स्थान हासिल गर्नेलाई ११ हजार १ सय ११ रुपैयाँसहित ट्रफी, मेडल र प्रमाणपत्र प्रदान गरिएको राष्ट्रिय लोक तथा दोहोरी गीत प्रतिष्ठान नेपाल गण्डकीकी अध्यक्ष माया गुरुङले जानकारी दिइन् ।

प्रतिष्ठान गण्डकीका अनुसार प्रथम, द्वितीय र तृतीय हुने कलाकारलाई तीन महिनासम्म निःशुल्क संगीत प्रशिक्षणको व्यवस्था गरिएको छ । प्रतियोगितामा सहभागी सबै कलाकारलाई जनही ५ हजार रुपैयाँ प्रोत्साहनस्वरूप प्रदान गरिएको थियो ।

प्रतियोगितामा गण्डकी प्रदेशका विभिन्न जिल्लाबाट आएका प्रतिभाहरूबीच कडा प्रतिस्पर्धा भएको थियो । कास्कीका समिर पुन, पर्वतकी शोभा परियार, बाग्लुङकी ललिता घर्ती मगर, म्याग्दीका शक्ति छिनाल, तनहुँकी मन्दिरा थापा मगर, गोरखाका निश्चल गुरुङ, लमजुङका युगेश परियार, स्याङ्जाकी बत्ती कुमारी थापा, नवलपुरका गणेश विक, मुस्ताङकी सबिता छिनाल तथा मनाङकी ममता तामाङले आफ्नो प्रस्तुति दिएका थिए ।

ग्राण्ड फिनालेको निर्णायकमा राष्ट्रिय लोक तथा दोहोरी गीत प्रतिष्ठान नेपालकी केन्द्रीय अध्यक्ष रिता थापामगर, संगीतकार सुरेश अधिकारी, लोकदोहोरी गायक राजु परियार र पशुपति शर्मा रहेका थिए ।

कार्यक्रममा गण्डकी प्रदेशकी सामाजिक विकास, युवा तथा खेलकुद मन्त्री रेखा गुरुङले लोकसंस्कृति नेपाली समाजको पहिचान र पुस्तौँदेखि जोगिएको सांस्कृतिक सम्पदा भएको बताइन् । उनले मौलिक लोकगीतले समाजलाई भावनात्मक रूपमा जोड्ने र नयाँ पुस्तालाई आफ्नो संस्कृतिसँग नजिक बनाउने धारणा राखिन् ।